Arpita Mukherjee : मशीन वापरून पैशांची मोजणी, आतापर्यंत 20 कोटी जमा, कोण आहे अर्पिता मुखर्जी?

अर्पिता मुखर्जीच्या घऱी मिळालेल्या रोख रकमेमुळे पश्चिम बंगाल सरकारवर विरोधी पक्ष टीका करत आहे. एसएससी घोटाळ्याची सूत्र मुख्यंत्री ममता बॅनर्जींपर्यंत जात असल्याचा आरोप भाजपने केला आहे.

ईडीच्या काही अधिकाऱ्यांनी पैशांच्या मोजणीसाठी काही बँक अधिकाऱ्यांनाही बोलावलं. बँक अधिकारी पैसे मोजण्याचं मशीन घेऊन मुखर्जीच्या घरी पोहोचले. ईडीच्या सूत्रांनी दिलेल्या माहितीनुसार मुखर्जी यांचं घर त्या 13 ठिकाणांच्या यादीत नव्हतं, जिकडे ईडी शुक्रवार सकाळपासून छापेमारी करत होतं.

अर्पिताच्या घरी अजूनही ईडीची कारवाई सुरू आहे. आतापर्यंत 21 कोटी रुपयांशिवाय लाखो रुपयांचे दागिनेही जप्त करण्यात आले आहेत. अर्पिता आणि पार्थ चटर्जी यांना ईडीने अटक केली आहे.

अर्पिता मुखर्जीने बांगला चित्रपटातील सुपरस्टार प्रोसेनजीतसोबत काही चित्रपटांमध्ये साइड रोल केले आहेत. याशिवाय अर्पिताने बांगला चित्रपट अमर अंतरनाडमध्येही अभिनय केला. आपल्या फिल्मी करियरमध्ये तिने जास्त साईड रोलच केले. बांगला चित्रपटांशिवाय तिने ओडिया आणि तामीळ चित्रपटांमध्येही काम केलं.

अर्पिता तृणमूल काँग्रेसचे ज्येष्ठ नेते पार्थ चटर्जी यांची जवळची सहकारी आहे. पार्थ चटर्जी पश्चिम बंगाल सरकारमध्ये वाणिज्य आणि उद्योग मंत्री आहेत.

ईडीच्या अधिकाऱ्यांनी रोख रकमेशिवाय टॉलीगंजच्या डायमंड सिटी परिसरामध्ये मुखर्जीच्या आलिशान घरातून 20 मोबाईलही जप्त केले. हे फोन WBSSC आणि WBBPE मध्ये शिक्षक भर्ती घोटाळ्यातली महत्त्वाची माहिती देतील, असं अधिकाऱ्यांना वाटत आहे.

अर्पिता मुखर्जी अभिनेत्रीशिवाय मॉडेलही आहे. ती अनेक वर्ष नकटला पूजेचा प्रचारही करत असल्याची माहिती सूत्रांनी दिली. तिला वेस्ट सेंटरमध्ये पार्थ चॅटर्जीसोबत प्रचार करतानाही पाहिलं गेलं होतं. मागच्या काही वर्षांपासून ती दक्षिण कोलकात्याच्या एका लक्झरी फ्लॅटमध्ये राहते.