मुख्यमंत्रिपदाचे दावेदार तेजस्वी 9वी, तर तेज प्रताप 12 वी पास; लालू यादवांच्या 7 कन्या मात्र उच्चशिक्षित

बिहारमध्ये दबदबा असणाऱ्या लालू प्रसाद यादव यांच्या कुटुंबाचा शैक्षणिक आढावा आपण घेणार आहोत. महागठबंधनचे मुख्यमंत्री पदाचे उमेदवार असणारे तेजस्वी यादव यांचे नववी पर्यंत शिक्षण झाले आहे. तर त्यांचे मोठे भाऊ असणारे तेज प्रताप यादव बारावीपर्यंत शिकले आहेत. त्यांनी महाविद्यालयात प्रवेश घेतला होता, मात्र नापास झाल्यामुळे शिक्षण अर्धवट सोडले.

लालू यादव यांना 7 मुली आहेत, त्यापैकी मीसा भारती या राजकारणात सक्रीय आहेत. इतर सहा मुली सार्वजनिक कार्यक्रमात दिसून येत नाहीत. मीसा भारती आरजेडीच्या राज्यसभा खासदार आहेत. त्यांनी MBBS चे शिक्षण पूर्ण केले आहे. महाविद्यालयीन टॉपर असून देखील त्यांनी प्रॅक्टिस केली नाही. कोट्यवधींची संपत्ती असणाऱ्या मीसा भारती यांचे शैलेंद्र कुमार यांच्याशी लग्न झाले आहे.

लालू प्रसाद यादव यांची दुसरी मुलगी रोहिणी आचार्य सिंगापूरमध्ये राहत असून त्या देखील एमबीबीएस आहेत. राजकारणात सक्रीय नसल्या तरी त्या कुटुंबासाठी सोशल मीडियावर सक्रीय असतात

लालू प्रसाद यादव यांची तिसरी मुलगी चंदा यादव यांनी एलएलबीचे शिक्षण पूर्ण केले आहे. पुण्यातून त्यांनी वकिलीचे शिक्षण घेतले आहे. चंदा यांनी एअर इंडिया वैमानिकाशी लग्न केले.

लालू यादव यांची चौथी मुलगी रागिणी यादव यांनी बारावीपर्यंत शिक्षण पूर्ण केले. रागिणी यांनी बीआयटी मेसरामधून इंजिनीअरींग करण्यास सुरूवात केली होती, मात्र 2006 मध्ये त्यांच्या बॉयफ्रेंडच्या मृत्यूनंतर यादव कुटुंबीयांनी त्यांना परत बोलावून घेतले

लालू यादव यांची पाचवी मुलगी हेमा यादव या इंजिनीअर आहेत. बीआयटी मेसरामधून त्यांनी इंजिनीअरींगचे शिक्षण पूर्ण केले.

लालू यादव कुटुंबातील सहावी मुलगी अनुष्का इंटिरिअर डिझायनर आहेत, त्यांचे हरियाणामध्ये लग्न झाले आहे.

लालू यादव यांची सातवी मुलगी राजलक्ष्मी यादव यांनी एमिटी विद्यापीठातून शिक्षण घेतले आहे. त्यांचे लग्न सपा नेता प्रताप यादव यांच्याशी झाले आहे. मुलायम सिंह यादव यांचे ते नातू आहेत. मात्र राजलक्ष्मी देखील राजकारणात सक्रीय नाही आहेत.

दरम्यान स्वतः लालू प्रसाद यादव उच्चशिक्षित आहेत. त्यांनी पॉलिटिकल सायन्समधून पीएचडी आणि वकिलीचं शिक्षण घेतलं आहे. तर राबडी देवी अल्पशिक्षित आहेत.