PM Modi in Kedarnath: मोदी पुन्हा जाणार केदारनाथाच्या भेटीला; ऐतिहासिक दिवशीच करणार नवी सुरुवात?

पंतप्रधान नरेंद्र मोदी 7 ऑक्टोबरला उत्तराखंड दौऱ्यावर जात आहेत. पण हा दौरा काही राजकीय कारणामुळे नाही तर मोदी केदारनाथ मंदिराला भेट देण्यासाठी येत आहेत, अशी प्राथमिक माहिती मिळत आहे.

पंतप्रधान मोदी आपल्या दौऱ्यात जॉली ग्रँट विमानतळाच्या नवीन टर्मिनलचे उद्घाटन करणार आहेत. याशिवाय ऋषिकेशमधील एम्समध्ये ऑक्सिजन प्लांटचेही उद्घाटन करतील. पंतप्रधान 7 ऑक्टोबरला केदारनाथलाही भेट देतील, अशी खात्रीलायक माहिती मिळाली आहे.

सूत्रांच्या माहितीनुसार, मोदींचा हा दौरा म्हणजे 2022 च्या उत्तराखंड विधानसभा निवडणुकीपूर्वीची तयारी असू शकतो. पंतप्रधान मोदी पुन्हा एकदा नोव्हेंबरमध्ये उत्तराखंडला येणार आहेत.

गेल्या सात वर्षांत पंतप्रधान मोदी जेव्हा जेव्हा उत्तराखंडमध्ये आले तेव्हा त्यांनी केदारनाथ मंदिराला भेट दिली आहे. पंतप्रधान मोदींना केदारनाथ मंदिराविषयी विशेष आस्था आहे. ते स्वतः केदारनाथ पुनर्बांधणीच्या कामांवर देखरेख करत आहेत.

या दौऱ्यासाठी 24 सप्टेंबर रोजी पंतप्रधानांचे विशेष सल्लागार भास्कर खुळबे यांनी पंतप्रधानांच्या दौऱ्यापूर्वी तयारीचा आढावा घेतला. या वेळी त्यांनी तीर्थक्षेत्रातील पुजाऱ्यांशी संवाद साधला. आता ऑक्टोबर आणि नोव्हेंबरमध्ये पंतप्रधानांच्या भेटीच्या बातम्यांमुळे उत्तराखंड भाजप फार उत्साहात आहे.

पंतप्रधान मोदींच्या या दौऱ्याच्या निमित्ताने भाजप प्रदेशाध्यक्ष मदन कौशिक म्हणाले की, पंतप्रधान जेव्हा जेव्हा उत्तराखंडला भेट देतात, तेव्हा राज्याला काही तरी फायदा झाला आहे. निवडणुकीपूर्वी ही महत्त्वाची वेळ असल्याने पक्षाला त्याचा फायदा होईल हे निश्चित आहे.