कधीकाळी अफूच्या शेतीमुळे होता कुख्यात; आता Lemon Grass च्या सुगंधामुळे आहे देशभर ख्याती

एके काळी अफूच्या लागवडीमुळे कुप्रसिद्धी झालेला नक्षलग्रस्त भागातला खुंटी जिल्हा आता Lemongrass मुळे चर्चेत आहे. झारखंडच्या खुंटी जिल्ह्यातेल शेतकरी गवती चहा पिकवू लागल्यामुळे त्याचं विक्रमी उत्पादन होत आहे.

शेतीविषयक बाबींमधील तज्ज्ञ अजय शर्मा सांगतात की, नक्षलवाद्यांनी प्रभावित झालेल्या भागात आता गावकऱ्यांच्या मदतीने लाखो आणि कोटींचा व्यवसाय चालू आहे. अलिकडच्या वर्षांत पोलिस-प्रशासनाची सक्रियता आणि ग्रामस्थांमध्ये जागरूकतेमुळे या ठिकाणची अफूची लागवड थांबली आहे.

गेल्या वर्षी खुंटी जिल्ह्यात सुमारे 200 एकर लेमन ग्रासची लागवड करण्यात आली होती. यावेळी लागवडीसाठी 700 एकरचे उद्दिष्ट ठेवण्यात आले आहे.

1 क्विंटल lemon grass पासून 1 लिटर औषधी तेल तयार होतं आणि 1 लिटर lemongrass oil ची किंमत 1200 ते 1400 रुपये आहे. आर्थिकदृष्या हे पिक शेतकऱ्यांसाठी प्रचंड फायदेशीर ठरत आहे.

आता देशभरात लेमनग्रास ऑइलला मागणी वाढली आहे. हे सुगंधी तेल सर्व प्रकारच्या उत्पादनांमध्ये, सौंदर्यप्रसाधनांमध्ये वापरलं जातं. एवढंच नाही तर अनेक प्रकारच्या औषधांमध्ये आणि विशेषत: सांधेदुखीसाठी तर हे अतिशय उपयुक्त मानलं जातं.

एके काळी खुंटी जिल्हा हा नक्षली घटना किंवा अफू लागवडीसाठी ओळखला जायचा. या गवतीचहाने जिल्ह्याची ओळखच बदलली. लेमनग्रासचं कोठार म्हणून याची आता ओळख आहे.