हे काय भलतंच! नवऱ्यामुलासह वऱ्हाडी म्हणून आला आणि वर झाला; नववधूसोबत घेतले सातफेरे

लग्न समारंभ म्हटलं, की नातेवाईकांची गर्दी, वऱ्हाडी, गर्दी, गोंधळ, गडबड ओघाने येतेच. लग्नात नवरदेव-नवरीसोबत अनेकदा वऱ्हाडी असतातच. परंतु देशात एका अशा अनोख्या लग्नाची चर्चा आहे, जिथे नवरदेवाऐवजी, सोबत आलेल्या वऱ्हाडीनेच नव-वधूसोबत सात फेरे घेतले आहेत.

या लग्नात अगदी चित्रपटात दाखवतात तसा ट्विस्ट आला. नवरीच्या घरी नवऱ्याकडील मंडळी तर आली. त्यांनी लग्नाआधी होणारे सर्व विधी पार पडले.

पण एकमेकांना हार घालण्यावेळी नवरा मुलगा लग्नातून थेट गायब झाला.

यावेळी नवऱ्यामुलाची मोठी शोधाशोधही झाली, पण अखेरीस तो गायब न होता स्वत: आपल्या मर्जीने पळून गेल्याची माहिती मिळाली.

आपल्या मुलीच्या लग्नात, नवरामुलगाच पळून गेल्याच समजताचं, वधूकडील मंडळींकडे परिस्थिती गंभीर झाली होती, आपल्या मुलीचं लग्न मोडल्याचं त्यांना अतिशय दु:ख झालं.

अशातच हे स्थळ शोधणाऱ्या मध्यस्थीला पकडण्यात आलं आणि त्याच्याकडेच यावर मार्ग काढण्याची मागणी करण्यात आली. याचदरम्यान आणखी एक अजब घटना घडली.

नवऱ्यामुलासह वऱ्हाडी म्हणून आलेला एक मुलगा, त्या मुलीशी लग्न करण्यास तयार झाला. त्याने मुलीकडील कुटुंबियांकडे तसा प्रस्तावही ठेवला.

मुलीकडील लोकांनीही हा प्रस्ताव मंजूर करत, आपल्या मुलीचं लग्न त्या वऱ्हाडी म्हणून आलेल्या मुलाशी लावून दिलं.

कानपूरमधील नरवल भागात ही घटना समोर आली असून अशाप्रकारे झालेल्या लग्नाची परिसरात एकच चर्चा सुरू आहे.