मुंबईतील निर्दोष दाम्पत्याला कतारमध्ये सुनावली 10 वर्षांची शिक्षा; तुरुंगातच दिला बाळाला जन्म

लग्नाची भेट म्हणून काकीने कतारचे हनिमून पॅकेज दिलं. मात्र हे हनिमून पॅकेजमुळे त्यांचं अख्खं आयुष्य बदललं. कतार विमानतळावर तपासणीत या दाम्पत्याजवळील पार्सलमध्ये 4 किलो चरस आढळल्याने दोघांनाही अटक झाली. या गुन्ह्यात दाम्पत्याला 10 वर्षांची शिक्षा सुनावण्यात आली.

कारागृहातच या दाम्पत्याने मुलीला जन्म दिला. आता वर्षभरानंतर या दाम्पत्याला अडकविणाऱ्याला पदार्फाश झाला आहे. त्यानंतर आता केंद्रीय अमली पदार्थ नियंत्रण विभागाने यांना मायदेशी परत आणण्यासाठी प्रयत्न सुरू केले आहेत.

या दाम्पत्याचे नाव मोहम्मद शरीक कुरेशी व पत्नी ओनिबा कुरेशी आहे. मुंबईत राहणारं हे कुटुंब उच्चशिक्षित आहे. गेल्या वर्षी 6 जुलै रोजी कतारच्या दोहा आंतरराष्ट्रीय विमानतळावर 4 किलो चरससह या दोघांना पकडण्यात आलं. यावेळी ओनिबा 3 महिन्यांची गर्भवती होती.

ओनिबाचे वकील शकील कुरेशी यांनी याबाबत एनसीबीकडे धाव घेतली होती. शकील यांनी त्यांचे नातेवाईक तबसुम रियाज कुरेशी आणि तिचा साथीदार निझाम कारा यांच्यामुळे ते यात अडकल्याचा दाट संशय व्यक्त केला होता. तबसुमने त्यांना लग्नाची भेट म्हणून कतारचे हनिमून पॅकेज दिले. सोबत कतारच्या नातेवाईकांकडे देण्यासाठी एक पार्सल सोबत दिल्याचेही शकील यांनी दिलेल्या तक्रारीत नमूद केले.

कतारला नवीन सीमकार्ड घ्यावे लागणार असल्याने तेथेच साधा फोन विकत घेणार असल्याने ठरवत दोघांनी त्यांचे मोबाइल घरीच ठेवले. याच मोबाइलमध्ये तबसुन, निझाम कारा यांच्यातील संवादाचे रेकॉर्डिंग कुरेशी यांनी एनसीबीकडे दिले आहे.

कुरेशी यांच्या तक्रारीनंतर एनसीबीने या प्रकरणाचा तपास सुरू केला. 22 डिसेंबर रोजी मुंबई पोलिसांनी दाखल केलेल्या गुन्ह्यात निझाम कारा आणि तबसुमला 13 ग्रॅम कोकेनसह अटक केली. एमसीबीने दुसरीकडे ड्रग्ज रॅकेट प्रकरणात कित्येक किलो चरस तस्करीत वेद राम, महेश्वर, शाहनवाज गुलाम चोराटवाज आणि शबानाला हे ड्रग्ज दिल्याचे समोर आले.

7 सप्टेंबर रोजी निझामला बेल मिळताच एनसीबीच्या पथकाने सापळा रचून त्याच्यावर लक्ष ठेवले. अखेर 14 ऑक्टोबर रोजी निझाम कारा आणि शाहिदा त्यांच्या हातील लागले. त्यांच्या चौकशीत त्यांनीच तबसुम मार्फत कुरेशी दाम्पत्याला यात अडकवल्याची माहिती समोर आली आहे. आता कारागृहात जन्मलेली मुलगी 1 वर्षांची झाली आहे.