Black Fungus: 'या' 10 राज्यांमध्ये काळ्या बुरशीचं थैमान, समोर आली धक्कादायक आकडेवारी

महाराष्ट्र: ब्लॅक फंगसचे सर्वाधिक रुग्ण हे महाराष्ट्रात आहेत. राज्यात आतापर्यंत 1500 हून जास्त ब्लॅक फंगसचे रुग्ण सापडलेत. त्यापैकी 500 जण बरे झाले असून 850 जणांवर उपचार सुरु आहेत.

राजस्थानः राजस्थान सरकारनं म्युकरमायकोसिसला महामारी म्हणून घोषित केलं. राजस्थानच्या आरोग्य विभागानं यासंदर्भात अधिसूचना जारी केली आहे. राज्यस्थानमध्ये जवळपास 100 जणांना म्युकरमायकोसिस झाल्याचं समजतंय. याच्या उपचारासाठी जयपूरच्या सवाई मानसिंह रुग्णालयात वेगळा वॉर्ड तयार करण्यात आला आहे.

उत्तर प्रदेश: ब्लॅक फंगसच्या रुग्णांची संख्या उत्तर प्रदेशमध्ये दिवसेंदिवस वाढत चालली आहे. आतापर्यंत 250 जणांना याची लागण झाली असून त्यापैकी 11 जणांचा मृत्यू झाला आहे. लखनऊमध्ये 73 जण आढळून आले तर त्यापैकी 7 जण म्युकरमायकोसिसचे बळी ठरलेत.

बिहार: बिहारमध्येही म्युकरमायकोसिसचे रुग्ण वाढू लागले आहेत. आतापर्यंत 110 जणांना म्युकरमायकोसिस झाल्याचं स्पष्ट झालं आहे. तर राज्यात म्युकरमायकोसिसनं एकाचा बळी घेतला आहे.

दिल्ली: देशाची राजधानी दिल्लीत जवळपस 200 रुग्ण आढळून आलेत. दिल्लीतल्या एम्स रुग्णालयात 61 आणि सर गंगाराम रुग्णालयात ब्लॅक फंगसच्या 69 रुग्णांवर उपचार सुरु आहे. दरम्यान मॅक्स आणि इंद्रप्रस्थ अपोलो रुग्णालयातही ब्लॅक फंगसचे बरेच रुग्ण आढळून आल्याची माहिती समोर आली आहे.

हरियाणा: हरियाणामध्ये म्युकरमायकोसिसचे आतापर्यंत 190 हून अधिक रुग्ण आढळून आलेत. या राज्यातील विविध जिल्ह्यांमध्ये जवळपास 25 रुग्णांचा मृत्यू झाला आहे. राज्यात वाढती रुग्ण संख्या पाहता हरियाणा सरकारनं 15 मे रोजी ब्लॅक फंगसला अधिसूचित रोग म्हणून घोषित केलं.

मध्य प्रदेश: कोरोनामुक्त झालेल्या रुग्णांमध्ये ब्लॅक फंगसची लागण झााल्यानं मध्य प्रदेश सरकारची चिंता वाढली आहे. जवळपास 585 कोरोनामुक्त किंवा कोरोनावर उपचार घेणाऱ्यांना ब्लॅक फंगसची लागण झाली आहे.

छत्तीसगड: या राज्यात ब्लॅक फंगसच्या रुग्णांची संख्या 100 च्या जवळपास आहे. तर एका रुग्णांचा ब्लॅक फंगसनं बळी घेतला. 92 रुग्णांवर सध्या रुग्णालयात उपचार सुरु आहेत. समोर आलेल्या माहितीनुसार, सर्वात जास्त 69 रुग्ण एम्समध्ये दाखल असून त्यापैकी 19 जणांचं ऑपरेशन झालं आहे.

उत्तराखंड: उत्तराखंडमध्ये 40 हून जास्त जणांना ब्लॅक फंगसची लागण झाली असून दोन जणांचा मृत्यू झाला आहे. सरकारनं ऋषिकेश एम्समध्ये ब्लॅक फंगसच्या रुग्णांसाठी व्यवस्था केली आहे.

झारखंड: या राज्यात आतापर्यंत 30 रुग्ण आढळून आलेत. तर चार जणांचा मृत्यू झाला आहे.