दारूचे साठे, जुगाराचा डाव... नेपाळी मुलींबरोबर सापडले भाजपचे आमदार; पोलिसांनी केली अटक

गुजरातच्या एका भाजप आमदाराला रिसॉर्टवर केलेली मौजमस्ती चांगली भोवणार आहे. दारूचा अवैध साठा करण्याप्रकरणी त्यांना पोलिसांनी अटक केली. काही नेपाळी तरुणीही आमदाराबरोबर सापडल्या आहेत.

गुजरातच्या भाजप आमदारांचं नाव आहे केसरी सिंह सोलंकी. खेडा जिल्ह्याच्या मटर विधानसभा मतदारसंघातून ते निवडून आले आहेत.

अवैध दारू आणि जुगार अड्ड्यांविरोधातल्या कारवाईत पोलिसांनी घातलेल्या छाप्यात त्यांच्यासह 25 जणांना अटक झाली आहे.

अवैधरित्या जुगार खेळणं, कोरोनाचे नियम न पाळणं आणि अवैध दारू बाळगणे अशा विविध कलमांतर्गत पंचमहाल जिल्हा पोलिसांनी आमदारासह 25 जणांना अटक केली आहे. यामध्ये 7 महिलांचा देखील समावेश आहे

याप्रकरणी, स्थानिक गुन्हे शाखेचे निरीक्षक राजदीपसिंग जडेजा यांनी सांगितलं की, पंचमहाल पोलिसांनी गुरुवारी रात्री पावागड शहरालगत असलेल्या एका रिसॉर्टवर छापेमारी केली. या कारवाईत आमदार केसरीसिंग सोलंकी यांच्यासह 25 जणांना जुगार खेळताना रंगेहाथ पकडण्यात आलं आहे.

या प्रकरणाने गुजरातमध्ये भारतीय जनता पक्षाच्या अडचणी वाढू शकतात.

आरोपी आमदार सोलंकी हे गुरुवारी दुपारीच शिवराजपूरच्या जिमीरा रिजॉर्टला गेले. त्यांच्याबरोबर सात महिला होत्या. त्यातल्या चौघी नेपाळी होत्या.