रेल्वे बांधतेय दोन ट्रॅकवाले बोगदे, खालून ट्रेन तर वरून जाणार वन्य प्राणी; पाहा PHOTOs

Separate tunnel for wild animals: देशात पहिल्यांदाच वन्यप्राण्यांचा विचार करून रेल्वे ट्रॅक बांधण्याचं काम सुरू आहे. मध्यप्रदेशातील इटारसी ते भोपाळ या मार्गावर तिसऱ्या रेल्वे लाईनचं काम जोरदार सुरू आहे. आधुनिक तंत्रज्ञानाचा वापर करत या ठिकाणी 5 नवे बोगदे तयार केले जात आहेत. रेल्वे ट्रॅकच्या बाजूलाच वन्य प्राण्यांसाठी एक पाणवठा तयार केला जात आहे. तिथं प्राणी पाणी पिण्यासाठी थांबू शकतील.

इटारसी ते भोपाळ या रेल्वेमार्गावरील तिसऱ्या ट्रॅकचं काम वेगाने सुरू आहे. अनेकदा जंगलातील प्राणी रेल्वे ट्रॅकवर आल्यामुळे त्यांचा मृत्यू होतो. त्यामुळे आता जंगलातून फिरताना प्राण्यांना रेल्वे ट्रॅक ओलांडण्याची गरजच पडू नये, असा बोगदा बांधला जात आहे. रेल्वे आणि प्राणी यांच्यासाठी वेगवेगळे बोगदे बांधले जात आहेत.

हे बोगदे दिल्ली-चेन्नई मार्गावर बांधले जात आहेत. या ठिकाणी एकूण 5 नव्या बोगद्यांचं काम सुरू आहे. यातील पहिला बोगदा एक किलोमीटर अंतराचा असणार आहे. या बोगद्याच्या बेस, लायनिंग आणि ड्रेनेजचं काम सुरू करण्यात आलं आहे.

दुसरा बोगदा मिडघाट या ठिकाणी असेल आणि 200 मीटरचा असेल. तर तिसरा बोगदा भीमकोठीपाशी 300 मीटरचा असणार आहे. चौथा बोगदा 150 मीटर लांबीचा तर पाचवा बोगदा 450 मीटर लांबीचा असणार आहे.