‘माझे कुटुंब, माझी जबाबदारी’: BMCचं पथक मातोश्रीवर, मुख्यमंत्र्यांच्या कुटुंबीयांची झाली आरोग्य तपासणी

कोरोनाला रोखण्यासाठी राज्य सरकारने ‘माझे कुटुंब, माझी जबाबदारी’ (My Family – My Responsibility) ही मोहिम सुरू केली आहे. या मोहिमेअंतर्गत BMCच्या आरोग्य पथकाने मंगळवारी (6 ऑक्टोबर) मुख्यमंत्री उद्धव ठाकरे यांच्या कुटुंबीयांची आरोग्य तपासणी केली.

BMCचं आरोग्य पथक सकाळीच वांद्रे पूर्व येथे मातोश्री निवासस्थानी दाखल झालं होतं. या पथकाने मुख्यमंत्री उद्धव ठाकरे, मंत्री आदित्य ठाकरे यांची तसेच परिवारातील इतर सदस्यांची आरोग्यविषयक तपासणी केली.

यामध्ये त्यांनी सर्वांची ऑक्सिजन पातळी, तापमान तपासले व आरोग्याची माहिती भरून घेतली.

यावेळी मुख्यमंत्र्यांनी या पथकाशी चर्चा करून या मोहिमेची अंमलबजावणी कशा प्रकारे केली जाते याबाबत माहिती घेतली आणि काही सूचनाही केल्या.

राज्यभर अशा प्रकारची मोहिम सुरू असून त्यामुळे कोरना बाधितांचं निदान लवकर व्हायला मदत होणार आहे.

निदान लवकर झालं तर अशा रुग्णांवर तातडीने उपचार करता येतील. त्यामुळे कोरोनाचा प्रसारही रोखला जाणार आहे.