भयंकर! राज्यात 249 कोरोना बळींची नोंद; मुंबईत एकाच महिन्यात वाढले 475% रुग्ण

राज्यातील कोरोना रुग्णांचा आकडा 40 हजार पार गेला आहे. गुरुवारी (1 एप्रिल, 2021) 43183 नवीन रुग्णांची नोंद झाली. यानंतर राज्यातील एकूण कोरोनाबाधितांचा आकडा 28,56,163 वर पोहोचला आहे.

राज्यातील गुरुवारी तब्बल 249 कोरोना बळींची नोंद झाली आहे. यापैकी 140 मृत्यू हे मागील 48 तासांतील आहेत तर 109 मृत्यू हे मागील आठवड्यातील आहेत, त्याची नोंद आता करण्यात आली. अशी माहिती आरोग्य विभागाने दिली आहे.

मुंबईतील कोरोना रुग्णांचा आकडा दिवसेंदिवस वाढतच आहे. कोरोना रुग्णसंख्या दररोज नवे उच्चांक गाठत आहे. आज (01 एप्रिल, 2021) दिवसभरात 8646 नवे कोरोना रुग्ण सापडले आहेत. एका दिवसात सापडलेले हे सर्वाधिक रुग्ण आहेत. तर 18 मृत्यू झाले आहेत.

मुंबई महापालिकेने दिलेल्या आकेडवारीनुसार 31 मार्चपर्यंत शहरातील एकूण कोरोना रुग्णांची संख्या 4,14,714 वर पोहोचली तर एकूण 11,686 मृत्यू झाले. पण या वर्षातील पहिल्या दोन महिन्यांच्या तुलनेत मार्चमध्ये कोरोनाची भयंकर आकडेवारी समोर आली आहे.

मुंबईत जानेवारीत एकूण 16,328 आणि फेब्रुवारीत 18,359 प्रकरणांची नोंद झाली होती. तर मार्चमध्ये 88,710 कोरोना रुग्णांची नोंद झाली.

याचा अर्थ मार्चमध्ये जानेवारीच्या तुलनेत 72,382 आणि फेब्रुवारीच्या तुलनेत 70,351 अधिक कोरोना प्रकरणं सापडली आहेत. एकाच महिन्यात जवळपास 475 टक्के जास्त प्रकरणं सापडली आहेत.

जानेवारीनंतर फेब्रुवारीत घसरलेला कोरोना रुग्णांच्या मृत्यूची संख्याही मार्चमध्ये पुन्हा वाढली आहे. जानेवारीत एकूण 237, तर फेब्रुवारीत 119  मृत्यू झाले होते. आता पुन्हा 200 पेक्षा अधिक मृत्यूची नोंद झाली. मार्चमध्ये  216 रुग्णांचा मृत्यू झाला आहे. फेब्रुवारीपेक्षा 181 टक्क्यांनी मृत्यूचा आकडा वाढला आहे.

एकिकडे कोरोना रुग्ण वाढत आहेत तर दुसरीकडे रुग्ण बरं होण्याचा दरही घसरला आहे. फेब्रुवारीत रिकव्हरी रेट 93 टक्के होता जो आता 85 टक्क्यांवर आला आहे.

अॅक्टिव्ह रुग्ण म्हणजे ज्या रुग्णांवर उपचार सुरू आहेत अशा रुग्णांची संख्यासुद्धा 51,411  वर पोहोचली आहे. फेब्रुवारीत हा आकडा 9,715 होता.

रुग्ण वाढण्याचं प्रमाणही गंभीर झालं आहे. फेब्रुवारीत रुग्ण वाढीचा दर हा फक्त 0.28 टक्के होता, पण मार्चमध्ये हा दर 1.37 टक्के झाला. तर रुग्ण दुप्पट होण्याचा कालावधीसुद्धा 245 वरून 49 दिवसांवर घसरला आहे.

या सर्व आकड्यांवरून मुंबईतील कोरोनाची भीषण परिस्थिती समोर येते आहे. आताच जर मुंबईकरांनी स्वतःला आवर घातला नाही तर ही परिस्थिती आणखी भीषण होऊ शकते.