घाटकोपर हिरे व्यापारी हत्येप्रकरणाचे टीव्ही अभिनेत्रीशी कनेक्शन!

घाटकोपरमधील व्यावसायिक राजेश्वर उदानी यांच्या हत्येप्रकरणी आणखी एक नवं वळण मिळालं. या प्रकरणी छोट्या पडद्यावरची आघाडीची अभिनेत्री देबोलिना भट्टाचार्जी हिचे नाव समोर आले आहे.

राजेश्वर उदानी यांच्या हत्येप्रकरणी देबोलिना भट्टाचार्जी हिची आज चौकशी करण्यात आली आहे.

घाटकोपरमध्ये राहणारे राजेश्वर उदानी हे हिरे आणि सोने- चांदीच्या दागिन्यांचे व्यापारी होते. ५७ वर्षीय उदानी हे २८ नोव्हेंबरपासून बेपत्ता होते. अंधेरीला जातो असं सांगून ते घरातून निघाले. पण त्यादिवसापासून ते घरी परतलेच नव्हते. शेवटी या प्रकरणी उदानी यांच्या कुटुंबीयांनी पोलिसांकडे तक्रार दाखल केली.

उदानी यांचा मृतदेह पनवेलजवळील जंगलात सापडल्यानंतर पोलिसांनी हत्येचा गुन्हा दाखल करत तपासाला सुरुवात केली. उदानी ज्या दिवशी बेपत्ता झाले त्या दिवशी त्यांच्या मोबाईलवर सचिन पवारने १३ कॉल केले होते. या आधारे पोलिसांनी तपास करत सचिन पवारला अटक केली.

पोलिसांनी सचिनची कारही ताब्यात घेतली आहे. आर्थिक वादातून ही हत्या करण्यात आल्याचं समजतं. सचिनला गुवाहाटीतून अटक करण्यात आली असून त्याच्यासोबत टीव्ही मालिकेतील एक अभिनेत्रीही होती. तिला देखील पोलिसांनी चौकशीसाठी ताब्यात घेतलं.

देबोलिना भट्टाचार्जी ही छोट्या पडद्यावरची आघाडीची अभिनेत्री आहे. तिने 'गोपी बहू' या गाजलेल्या मालिकेत भूमिका साकारली होती. तिने 'सवारे सबके सपने प्रीतो' मधून मालिकेत पदार्पण केले होतं.

'साथ निभाना साथीया' या मालिकेमुळे ती लोकप्रिय झाली होती. तसंच डान्स इंडिया डान्स-2 मध्ये तिने भाग ही घेतला होता.

मध्यंतरी लवलीन कौर, विशाल सिंह या कलाकारांसोबत तिचा वाद झाला होता. अलीकडे आलेल्या 'लाल इश्क' या मालिकेतही तिने लक्षवेधी भूमिका साकारली होती.

राजेश्वर उदानी यांचे अनेक यांचे संबंध टीव्ही कलाकारांपासून डान्स बारच्या मुलींसोबतही होते. याच संबंधामुळं हत्या करण्यात आल्याचा पोलिसांचा अंदाज आहे.

आज देबोलिना भट्टाचार्जीची पोलिसांनी चौकशी केली.