आजपासून करता येईल स्वस्त सोनेखरेदी! ऑनलाइन पेमेंट केल्यास अतिरिक्त डिस्काउंट

बाजारभावापेक्षा काहीशा कमी दराने ही सोनेखरेदी करता येईल. सरकार सॉव्हरेन गोल्ड बॉन्ड स्कीम 2020-21 (Sovereign Gold Bond Scheme 2020-21) सी​रीज VIII आजपासून सुरू करत आहे. 13 नोव्हेंबरपर्यंत तुम्हाला हे सब्सक्रिप्शन खरेदी करता येईल. यावेळी आरबीआयकडून सोन्याचे भाव 5,177 रुपये प्रति ग्रॅम निश्चित करण्यात आले आहे.

ऑनलाइन पेमेंट केल्यास 50 रुपये प्रति ग्रॅम सूट- SGB साठी ऑनलाइन अर्ज केल्यानंतर आणि डिजिटल माध्यमातून पैसे भरल्यानंतर प्रति ग्रॅम 50 रुपयांची सवलत देखील देण्यात येईल. डिजिटल पेमेंट करणाऱ्यांसाठी ही किंमत 5127 रुपये असेल. याआधीच्या 12 ऑक्टोबर रोजी जारी करण्यात आलेल्या गोल्ड बाँडची किंमत प्रति ग्रॅम 5,051 रुपये होती.

सॉव्हरेन गोल्ड बाँडमध्ये वैयक्तिक स्वरुपात कमीत कमी 1 ग्रॅम तर जास्तीत जास्त 4 किलो सोन्याची गुंतवणूक करता येते. या बाँडच्या मॅच्यूरिटीचा कालावधी 8 वर्षांचा असतो. मात्र यामध्ये गुंतवणुकीनंतर पाचव्या वर्षी स्कीममधून बाहेर पडण्याचा देखील पर्याय असतो.

सरकारकडून आरबीआयच्या माध्यमातून हे गोल्ड बाँड जारी केले जातात. आरबीआयने अशी माहिती दिली आहे की, भारत बुलियन अँड असोसिएशन लिमिटेडकडून गोल्ड बाँड जारी करण्याच्या आधीच्या आठवड्यातील शेवटच्या 3 व्यवहाराच्या दिवसात 999 शुद्धतेच्या सोन्याच्या किंमतीच्या आधारे या बाँडच्या किंमती ठरतात.

Sovereign Gold Bond ची विक्री बँक, स्टॉक होल्डिंग कॉर्पोरेशन ऑफ इंडिया लिमिटेड, निवडण्यात आलेले पोस्ट आणि एनएसई तसच बीएसईच्या माध्यमातून होते. यातील कोणत्याही ठिकाणी जाऊन तुम्ही बाँड योजनेमध्ये सामील होऊ शकता.

सॉव्हरेन गोल्ड बाँडमध्ये 2.5 टक्क्यांचे व्याज मिळते. गोल्ड बाँडमध्ये महत्त्वाची बाब म्हणजे याच्या स्टोअरेजची चिंता करावी लागत नाही. डिमॅटमध्ये ठेवल्यास याकरता कोणताही जीएसटी द्यावा लागत नाही. जर गोल्ड बाँडच्या मॅच्यूरिटीवर कोणताही कॅपिटल गेन्स बनला तर यावर सूट मिळते. गोल्ड बाँडवर हा एक्सक्लूझिव्ह लाभ मिळतो.