भाजप आमदाराच्या पुत्राला 40 लाखांची लाच घेताना अटक, छाप्यात 6 कोटी रुपये जप्त

कर्नाटकच्या लोकायुक्तांच्या पथकाने भाजप आमदार एम वीरुपक्षप्पा यांच्या घरी धाड टाकली. यात ६ कोटी रुपयांची रोख रक्कम जप्त केली आहे. वीरुपक्षप्पा हे चन्नागिरी विधानसभा मतदारसंघातून आमदार असून त्यांचा मुलगा बंगळुरू पाणी पुरवठा आणि सीवरेज बोर्डाचा मुख्य लिपिक आहेत.

गुरुवारी लोकायुक्तांच्या पथकाने प्रशांतच्या कार्यालयावर छापा टाकत त्याला ४० लाख रुपयांची लाच घेत असतानाच अटक केली. प्रशांत वडिलांच्या नावाने लाच घेत होता.

कारवाईनंतर पथकाकडून निवेदन जारी करण्यात आलं आहे. त्यात म्हटलं की, कर्नाटक लोकायुक्तांच्या भ्रष्टाचार प्रतिबंधक विभागाने भाजप आमदार वीरुपक्षप्पा यांचा मुलगा प्रशांत मदल याला ४० लाख रुपयांची लाच घेताना अटक केली. त्याच्या कार्यालयातून १.७ कोटी रुपयांहून अधिक रोख रक्कमही जप्त केली आहे.

लोकायुक्तांच्या पथकाने सांगितले की, प्रशांतविरोधात एक तक्रार मिळाली होती. त्यात साबण आणि डिटर्जंट बनवण्यासाठी कच्च्या मालाच्या व्यवहारासंदर्भात एका ठेकेदाराकडे ८१ लाख रुपयांची लाच मागण्यात आली होती. यानंतर प्रशांतला लाच घेताना पकडण्याची योजना आखण्यात आली होती.

कर्नाटकात एप्रिल-मे महिन्यात विधानसभेच्या निवडणुका असून यात भ्रष्टाचाराचा मुद्दा विरोधकांकडून उचलून धरला जात आहे. याआधी भाजप सरकारवर ४० टक्के कमीशन आणि टेंडरमध्ये लाच घेतल्यावरून आरोप केले गेले आहेत.