आता स्लो इंटरनेटला म्हणा 'बायबाय'! सरकारने टेलीकॉम कंपन्यांसाठी जारी केला नवा आदेश

हे इंटरनेटचे युग आहे आणि सर्व काही इंटरनेटवर अवलंबून आहे. इंटरनेट थोडे जरी स्लो झाले तर आपली अनेक कामं रखडतात. मात्र आता तुम्हाला इंटरनेटचा चांगला स्पीड मिळू शकतो. कारण टेलीकॉम कंपन्यांनी ब्रॉडबँडची व्याख्या बदलली आहे. आता टेलीकॉम कंपन्यांना ब्रॉडबँडसाठी किमान 2 एमबीपीएस स्पीड द्यावा लागणार आहे. आतापर्यंत 512 केबीपीएस ब्रॉडबँड मानला जात होता.

ब्रॉडबँडचे भारतात सुमारे 85 कोटी ग्राहक आहेत. यापैकी 82.5 कोटी ग्राहक मोबाईलवर ब्रॉडबँड वापरतात. एवढेच नाही तर देशातील अडीच कोटी लोकांकडे लँडलाइन ब्रॉडबँड आहे. आता कंपन्यांना ब्रॉडबँड म्हणवून घेण्यासाटी स्पीड वाढवावा लागेल. आता 2G 3G सेवा ब्रॉडबँडच्या श्रेणीत येणार नसल्याचे अधिसूचनेत म्हटले आहे.

TRAI ने 2013 आणि 2021 मध्ये स्पीड वाढवण्याची शिफारस केली होती. TRAI च्या शिफारशींवर, डिपार्टमेंट ऑफ टेलीकम्युनिकेशन(DoT)ने टेलीकॉम कंपन्यांसाठी किमान स्पीड 2MBPS केला आहे. त्याची तातडीने अंमलबजावणी करण्यात येईल, असे नोटिफिकेशनमध्ये म्हटले आहे.

स्पीडटेस्ट ग्लोबल इंडेक्स डेटानुसार, डिसेंबर 2022 मध्ये भारताचा इंटरनेट स्पीड सुधारला आहे पण तरीही जागतिक क्रमवारीत 79 व्या स्थानावर आहे.

भारतात मोबाईल डाउनलोड स्पीड 18.26 MBPS वरून 25.29 MBPS वर पोहोचला आहे. नुकतेच भारतात 5G सेवा देखील सुरू झाल्या आहेत, ज्यामुळे इंटरनेटचा वेग लक्षणीय वाढला आहे.