अर्थसंकल्पाआधी हलव्याची परंपरा दोन वर्षांनी पुन्हा सुरू, अर्थमंत्री सीतारमण यांनी केले वाटप

देशाचा अर्थसंकल्प अवघ्या काही दिवसांवर आला आहे. अर्थसंकल्पाची तयारी अंतिम टप्प्यात आली असून २६ जानेवारीला अर्थमंत्री निर्मला सीतारामन यांनी हलवा वाटप करून अर्थसंकल्पाच्या दस्ताऐवजांना अंतिम रूप दिलं.

अर्थसंकल्पाच्या कागदपत्रांना अंतिम रूप देण्याआधी परंपरेनुसार हलवा वाटप केले जाते. कोरोनामुळे गेल्या दोन वर्षात ही परंपरा खंडित झाली होती.

दोन वर्षांनी पुन्हा एकदा हलवा वाटपाचा समारंभ पार पडला. यावेळी अर्थमंत्री निर्मला सीतारामन यांच्यासह इतर केंद्रीय मंत्री उपस्थित होते.

बजेटमध्ये हलवा समारंभ आवश्यक आहे कारण कोणत्याही चांगल्या कामाची सुरुवात गोडाधोडाने होते. 26 जानेवारी ते 1 फेब्रुवारीपर्यंत अधिकाऱ्यांना मंत्रालयातच राहायचं आहे. ते त्याच्या कुटुंबीयांशी ही संपर्क साधू शकत नाही. त्यांना आपल्या कुटुंबापासून दूर राहावे लागते.

गेल्या वर्षी अर्थसंकल्प छापण्याआधी हलवा समारंभ झाला नव्हता. गेल्या वर्षी कर्मचाऱ्यांना त्यांच्या कार्यालयात मिठाई देण्यात आली होती. दरवर्षी अर्थसंकल्पाची छपाई सुरू होण्यापूर्वी हलवा समारंभ होतो.

अर्थमंत्री निर्मला सीतारमण 1 फेब्रुवारी 2023 रोजी देशाचं बजेट सादर करणार आहेत. मोदी सरकारच्या दुसऱ्या कार्यकाळातलं हे शेवटचं बजेट असेल. त्यानंतर 2024 च्या निवडणुका होणार आहेत.