Nagpur : भरधाव ट्रॅव्हल्सची ट्रकला जोरदार धडक, दोन शेतकऱ्यांसह तिघे ठार; 8 प्रवासी जखमी

नागपूर-सावनेर महामार्गावर पाटणसावंगी येथील उड्डाणपुलावर भरधाव ट्रॅव्हल्सने ट्रकला धडक दिली. या भीषण अपघातात तिघांचा मृत्यू झाला तर आठ प्रवासी जखमी झाल्याचं वृत्त समोर आलं आहे.

गुरुवारी पहाटे 5.30 वाजताच्या सुमारास हा अपघात घडला. धनराज वानखेडे व शिवराम रामाधार चौरिया या दोन शेतकऱ्यांसह ट्रॅव्हल्स चालक रवी मालवीय यांचा मृत्यू झाला.

शेतकरी आयशर ट्रकमध्ये छिंदवाडा येथून लसणाचे कट्टे घेऊन नागपूर भाजी मार्केटमध्ये जात होते. पहाटे 5.30 वाजताच्या सुमारास पाटणसावंगी उड्डाणपुलावर भरधाव ट्रॅव्हल्सने आयशर ट्रकवर मागच्या बाजूने जोरदार धडक दिली. यात आयशर ट्रकच्या मागील भागात बसलेल्या दोन शेतकऱ्यांचा घटनास्थळीच मृत्यू झाला.

ट्रॅव्हल्स चालकासह आठ प्रवासी जखमी झाले आहेत. घटनेनंतर आयशर ट्रक चालक फरार झाला. अपघाताची माहिती समजताच पोलीस घटनास्थळी दाखल झाले.