महाराष्ट्राने पाहिलेला मोठा राजकीय संघर्ष संपुष्टात? पवार-विखेंच्या नव्या पिढीचं मनोमिलन

शरद पवार आणि बाळासाहेब विखेंमधील राजकीय वैर महाराष्ट्राला चांगलंच माहित आहे.

पण राजकारणात कुणीही कायमचा शत्रू नसतो, असं म्हटलं जातं.

आता पवार आणि विखे पाटील यांची तिसरी पिढी एकत्र आल्याचं पाहायला मिळालं आहे.

शरद पवार यांचे नातू रोहित पवार यांनी विखेंचे नातू असलेल्या सुजय यांची भेट घेतली आहे.

रोहित पवार यांनी प्रवरा नगर इथल्या विखे पाटील सहकारी कारखान्याला भेट दिली आहे.

दरम्यान पवार आणि विखेंची ही पुढची पिढी राजकारणात सक्रिय झाल्याचं चित्र आहे.

सुजय हे नगर लोकसभा यासाठी आग्रही आहेत. पण अहमदनगरची जागा राष्ट्रवादी काँग्रेस सुजय विखे पाटील यांच्यासाठी सोडणार का, याबाबत अजूनही प्रश्नचिन्ह कायम आहे.

रोहित पवार हे कर्जत विधानसभेसाठी तयारी करत असल्याची राजकीय वर्तुळात चर्चा आहे.

या दोन्ही राजकीय घराण्याच्या तिसऱ्या पिढीतील युवकांचं मनोमिलन नवीन राजकीय नांदी ठरणार का, याकडे लक्ष लागले आहे