Nashik: लेकीच्या पहिल्या मासिक पाळीचा कुटुंबाकडून महोत्सव, कौतुकास्पद कार्यक्रमाचे पाहा PHOTO 

नाशिक, 6 ऑगस्ट : मासिक पाळी (Menstrual cycle ) संदर्भात आज ही समाजात फारसं बोलल जात नाही. अनेक ठिकाणी हा विटाळ मानला जातो. नाशिकच्या एका कुटुंबानं मात्र लेकीच्या पहिल्या पाळीचा महोत्सव केला.

नाशिकमध्ये (Nashik) अंधश्रध्दा निर्मूलन समितीचे कार्यवाहक कृष्णा चांदगुडे (Krushna Chandgude) यांनी आपली मुलगी यशदा (Yashda) हिला पहिल्यांदा मासिक पाळी आली म्हणून 'आता माझी पाळी, मीच देते टाळी' या मासिक पाळी महोत्सवाचे आयोजन केले होते.

मासिक पाळी संदर्भात ही जनजागृती व्हावी. त्याच महत्व सर्वांना कळावे म्हणून या कार्यक्रमातून शॉर्ट फिल्म, मासिक पाळी वरील जनजागृतीपर गीत, व्याख्यान आयोजित करून प्रबोधन करण्यात आले

मुलगी वयात आल्यावर तिच्या योनीमार्गातून दर महिन्यास जो रक्तस्राव होतो त्याला मासिक पाळी असे म्हणतात. साधारणतः मुलगी 12-13 वर्षांची झाली की, मासिक पाळी सुरू होते. कधी कधी या अगोदरही सुरू होऊ शकते. ही नैसर्गिक प्रक्रिया आहे.

या कार्यक्रमात यशदाचं सर्व महिलांनी औक्षण करत स्वागत केलं. तिला पुढील वाटचालीसाठी शुभेच्छा दिल्या.

आजही समाजात या विषयावर बोललं जात नाही. सर्वच आपल्याला गप्प बसायला सांगतात. त्यामुळे या कार्यक्रमाचा आनंद वाटतोय. या कार्यक्रमातून जनजागृती होईल,' असे मत यशदानं यावेळी व्यक्त केले.

'मासिक पाळीबद्दल शहरात काही प्रमाणात का होईना महिलांना, मुलींना माहिती आहे. मात्र ग्रामीण भागात याची जास्त माहिती नाही. मासिक पाळी आली की महिलांना दूर ठेवलं जातं. त्यांना कुठे शिवू दिलं जात नाही. या परंपरा आजही सुरू आहेत. त्यामुळे जनजागृती होऊन बदल होण्याची गरज आहे,' असे मत समाजसेविका कोमल वर्दे यांनी व्यक्त केले.