Happy New Year : नवीन वर्षाचं स्वागत करण्यासाठी कोल्हापुरातील 10 बेस्ट ठिकाणं! पाहा Photos

करवीर निवासिनी अंबाबाईच्या आशिर्वादानं तुम्ही नववर्षाची सुरूवात करु शकता. कोल्हापूरच्या मध्यवर्ती भागात हे मंदिर आहे. या मंदिरात वर्षभर गर्दी असते. देवीच्या आशिर्वादानं अनेक जण नवीन वर्षाची सुरूवात करतात.

अंबाबाई मंदिराच्या अगदी जवळ असणारा रंकाळा तलाव हे ठिकाण देखील पर्यटकांच्या यादीतील महत्त्वाचे नाव आहे. या तलावाचे सुंदर दृश्य, बाजूने बगीचा आणि सेलिब्रेशनसाठी विविध गोष्टी या ठिकाणी आहेत. त्यामुळे पर्यटकांची पाऊले आपसूकच या ठिकाणी वळतात.

कोल्हापूर शहरातच असणारे टाऊन हॉल हे वस्तुसंग्रहालय अतिशय उत्तम माहितीचे भांडार आहे. या वस्तुसंग्रहालयामध्ये जवळपास अडीच हजार वर्षांपूर्वीच्या कोल्हापूरचा इतिहास उलगडणाऱ्या अनेक गोष्टी पाहता येतात.

नवीन राजवाडा अर्थात न्यू पॅलेस हे देखील एक संग्रहालय आहे. कसबा बावडा रोडवर असणारा हा राजवाडा म्हणजे आजचे, श्रीमंत शाहू महाराजांचे निवास्थान आहे. तर राजवाड्याच्या आतील बाजुस छत्रपती शाहू महाराजांच्या वस्तु संग्रालयासाठी जागा केली आहे. याला लागूनच एक बाग असून त्यामध्ये प्राणीसंग्रहालय आहे.

कोल्हापूर मध्यवर्ती बस स्थानकापासून अगदी 5 मिनिटांच्या अंतरावर असलेले टेंबलाई मंदिर या ठिकाणाला देखील तुम्ही भेट देऊ शकता. शहराच्या अगदी जवळच हे शांत असे एक ठिकाणी आहे. या टेंबलाई टेकडीवर टेंबलाई किंवा त्र्यंबोली देवीचे आणि यमाई देवीचे मंदिर आहे.

श्री क्षेत्र जोतिबा येथे वडणगे, कुशिरे मार्गाने जाताना पोहाळे येथील बुद्धकालीन लेणी हे देखील भेट देण्यासाठी अत्यंत चांगले ठिकाण आहे. कोल्हापूरपासून १५ किमी अंतरावर ही लेणी आहेत. रोडवरून थोड्या आतल्या बाजूला गेल्यानंतर डोंगराच्या कुशीत ही लेणी देखील पाहता येतात.

पुणे-बेंगलोर महामार्गावरून कोल्हापूरला जाताना टोप गावाजवळ एक उंचच उंच गणेशमूर्ती दिसते. चिन्मय मिशनने कर्नाटकातून 50 कारागीरांकडून 18 महिन्यांमध्ये ही मूर्ती बनवून घेतली आहे. 24 फूट उंचीच्या ध्यानगृहावर ही 61 फूट उंच अशी बैठी गणेशमूर्ती आहे.

आंदुर डॅम हा कोल्हापूर पासून 47 किमी लांब असणारा पण एक चांगला पिकनिक स्पॉट ठरू शकतो. तुम्ही जर फॅमिली सोबत फिरायला जाणार असाल. तर या ठिकाणी अगदी कमी किंमतीत जेवणाची सोयही इथं आहे.

कोल्हापूर शहरापासून 60 किलोमीटर अंतरावर गगनबावडा तालुक्यात गगनगिरी महाराजांचा मठ देखील उत्तम पर्याय आहे. या ठिकाणाहून दिसणारे निसर्गसौंदर्य डोळ्यांचे पारणे फेडणारे आहे.

गगगबावडा तालुक्यातच अतिशय प्राचिन असे मोरजाई पठार हे देखील पर्यटकांसाठी उत्तम ठिकाण आहे. या पठारावरून परिसरातील दृश्य अतिशय रमणीय दिसते. हे पठार संपूर्ण जांभ्या खडकामध्ये आहे. मोरजाईचे मंदिर हे गुंफेत आहे. इथे विविध वीरगळ, सतीगळ, युगुल प्रतिमा, एकल प्रतिमा अशा अनेक प्रतिमा पाहायला मिळतात.

कोल्हापूर हा एक ऐतहासिक, धार्मिक आणि निसर्ग सौंदर्याने नटलेला जिल्हा आहे त्यामुळे या यादीतील ठिकाणांबरोबरच अजूनही अनेकानेक सुंदर, रमणीय पर्यटनस्थळं कोल्हापुरात आहेत.नववर्षारंभ साजरा करण्याबरोबरच वर्षभरात केव्हाही या ठिकाणी भेट देऊ शकतो. पण त्यावेळची त्या ठिकाणची अधिकची माहिती स्थानिक प्रशासनाकडून घेणे केव्हाही उत्तम.