Kolhapur floods : बाप रे, पुराचं पाणी वाढायलंय! पंचगंगा नदीचं पाणी पात्राच्या बाहेर; आजूबाजूच्या गावांना सतर्कतेचा इशारा : PHOTOS

राज्यात मुसळधार पावसाचा आणि त्यातून निर्माण होणाऱ्या महापुराचा सर्वाधिक फटका कोल्हापूर आणि सांगली जिल्ह्याला बसतो.

सोमवारपासून सुरू झालेल्या पावसामुळे कोल्हापूर शहरातील रंकाळा तलाव, कळंबा तलाव, राजाराम तलाव आणि महत्त्वाचं म्हणजे पंचगंगा नदीच्या पाण्याची पातळीवर वाढली आहे.

कोल्हापुरात काल संध्याकाळी एनडीआरएफची 2 पथकं दाखल झाली आहेत. यामध्ये 25 जवानांचा समावेश आहे.

मागील 2 दिवसांपासून पावसाचा जोर कायम आहे, त्यामुळे पूरस्थिती निर्माण होण्याची शक्यता आहे. 8 जुलैपर्यंत अतिवृष्टीचा इशारा दिल्यामुळे प्रशासनही अलर्ट मोडवर आलेले आहे.

धरण क्षेत्रांमध्ये मागील 24 तासांमध्ये पाऊस मोठ्या प्रमाणात पडल्यामुळे पंचगंगा नदीच्या पाणी पातळीत 10 फूटांनी वाढ झालेली आहे. जिल्ह्यातील 6 बंधारे पाण्याखाली गेलेले आहेत.

या पार्श्वभूमीवर जिल्हाधिकाऱ्यांनी धबधब्याच्या ठिकाणी किंवा पूर पाहण्यासाठी नदीच्या काठी नागरिकांनी जाऊ नये, असे आवाहन केलेले आहे.

सोमवारपासून सुरू असलेल्या पावसाच्या रिपरिपीमुळे शहारातील नदीकडेच्या वसाहतींमध्ये आणि शेतामध्ये पाणी शिरलेले आहे.

नदीच्या पाण्याची पातळी वाढल्यामुळे लक्षतिर्थ वसाहतीमध्ये जाणाऱ्या मुख्य रस्त्यावरच 4-5 पाणी वाढलेले आहे. कंबरेइतक्या पाण्यामध्ये वाट काढत शेतकरी आणि नागरिक मुख्य रस्त्यावर येत आहेत.

तसेच नदीकडेच्या असणाऱ्या शेतीमध्ये पंचगंगा नदीचे पाणी शिरलेले आहे. तसेच पंचगंगा घाटावरील पायऱ्या आणि तेथील अनेक मंदिरे नदीच्या पाण्यात पूर्णपणे बुडाली आहे.

नदीचे पाणी पात्राच्या बाहेर येण्यास सुरूवात झाली आहे. त्यामुळे गंगावेश, लक्षतिर्थ, उत्तरेश्वर गल्ली या भागांमध्ये पुराचे पाणी शिरण्याची शक्यता जास्त आहे.

कोल्हापूर जिल्ह्याला दरवर्षी पुराचा फटका बसतोच. मध्य शहरातील जंयती नाल्याचे पात्राबाहेर आल्यामुळे लक्ष्मीपुरी, व्यापारी पेठ, शाहुपरी, व्हिनस काॅर्नर, उदयसिंहनगर इत्यादी भाग पाण्याखाली जातात.

तसेच पंचगंगा नदीच्या पाण्याची पातळी वाढली की, मुख्य शिवाजी पुलाच्या पलिकडील गावांमध्ये पाणी हमखास शिरते. जनजीवन विस्कळीत होतेच, त्याचबरोबर जनावरे वाहून जाण्याच्या अनेक घटना घडतात.

जयंती नाल्याच्या पाण्यामुळे लक्ष्मीपुरीतील धान्य बाजारपेठेतील दुकाने सर्रास पाण्यात जातात आणि प्रचंड नुकसान होते. तसेच शाहुुपुरील विल्सन पुलाजवळील संपूर्ण वस्ती पुराच्या पाण्यात बुडते.

त्याचबरोबर कुभांर गल्लीदेखील पाण्याखाली जाते. ऐन गणेश चतुर्थीच्या सिझनमध्ये मुर्ती घडविण्याचे कारखाने पाण्यामध्ये जातात, यावेळी कुभांर काम करणाऱ्या कारगीरांचे मोठे नुकसान होते.

2005 पासून पुराचा तडाखा कोल्हापुरचा थोड्याफार प्रमाणात बसतच आला आहे, त्यामुळे प्रशासन अगोदरच सतर्क राहते. यंदा प्रशासनाकडून पावसाचे प्रमाण वाढणार आहे की, नाही... धरणांतून कधी पाणी सोडण्यात येणार आहे, कोणती खबरदारी घ्यावी, याची माहिती पूरबाधित क्षेत्रांतील लोकांना मोबाईलवर मिळण्याची शक्यता आहे. कारण, प्रशासनाकडून मागील वर्षी (2021) आलेल्या पुराचा फटका बसलेल्या 409 गावांतील कुटुंबांचा एक डेटाबेस कोल्हापूर प्रशासनाने तयार केलेला आहे.