तयारी पूर्ण! ‘राष्ट्रवादी’ प्रवेशासाठी एकनाथ खडसे चार्टर्ड हेलिकॉप्टरने मुंबईत दाखल

मुक्ताईनगर : राष्ट्रवादी प्रवेशासाठी ज्येष्ठ नेते एकनाथ खडसे हे गुरूवारी दुपारी सहकुटुंब मुंबईला विशेष चार्टर्ड हेलिकॉप्टरने रवाना झाले. मुक्ताई साखर कारखान्याच्या हेलिपॅडवरून रवाना होतांना चाहत्यांनी गर्दी केली होती.

खडसेंसोबत त्यांच्या पत्नी मंदाकिनी खडसे, कन्या ऍड. रोहिणी खडसे आणि मदतनीस गोपाळ चौधरी हे देखील मुंबईत आले आहेत.

एकनाथ खडसे यांनी बुधवारी (21 ऑक्टोबर) दुपारी भाजपच्या प्राथमिक सदस्यत्वाचा राजीनामा दिला होता. त्यानंतर राष्ट्रवादीचे प्रदेशाध्यक्ष जयंत पाटील यांनी खडसे राष्ट्रवादीत प्रवेश करत असल्याची घोषणा केली होती. शुक्रवारी दुपारी दोन वाजता मुंबईत शरद पवारांच्या उपस्थितीत राष्ट्रवादीत प्रवेश करणार आहेत.

एकनाथ खडसेंच्या राष्ट्रवादी प्रवेशाची निश्चितता झाल्यानंतर त्यांच्या मुंबई दौऱ्याकडे सर्वांचे लक्ष लागले होते. खडसेंसोबत कोण कोण मुंबईत जाणार याबाबत खूप उत्सुकता होती.

खडसे मुंबईला जात असताना त्यांना निरोप देण्यासाठी त्यांचे समर्थक मोठ्या संख्येने मुक्ताई साखर कारखान्याच्या आवारात जमले होते. खडसे यांनीही आत्मियतेने कार्यकर्त्यांची विचारपूस केली.

माजी मुख्यमंत्री देवेंद्र फडणवीस यांच्यावर गंभीर आरोप करत एकनाथ खडसे यांनी भाजपला राम राम केला होता. त्यांचा राज्य मंत्रिमंडळात समावेश होणार असल्याचंही बोललं जात आहे.