Beed News: अंबाजोगाईतील ऐतिहासिक ठेव्याची घेतली जाणार विशेष काळजी, 'या' ठिकाणी होणार जतन, Photos

महाराष्ट्रात ऐतिहासिक आणि धार्मिक महत्त्व असणारी अनेक पुरातन मंदिरे आहेत. काही ऐतिहासिक वास्तूंची पडझड झालेली दिसते.

बीड जिल्ह्यातही शिल्पकलेचा उत्तम नमुना असणाऱ्या काही वास्तू आहेत. अंबाजोगाईच्या शहरात बालघाटाच्या डोंगर रांगेत सकलेश्वर बारा खांबी मंदिर आहे. हे मंदिर चालुक्य राजाच्या काळातील आहे.

या मंदिराची काही प्रमाणात पडझड झाली आणि मूर्ती व शिळा याच परिसरात अस्ताव्यस्त झाल्या. अनेकांनी मागणी केल्यानंतर 2017 मध्ये पुरातत्व विभागाने या मंदिराचे पुनर्निर्माण करण्यासाठी उत्खनन सुरू केले.

सखलेश्वर मंदिर परिसरात 7 ते 8 महिने काम सुरू होते. या ठिकाणी 115 मूर्ती विखरून पडलेल्या आढळल्या.

सखलेश्वर मंदिर परिसरात आढळलेल्या 115 मुर्ती एका पत्र्याच्या शेडमध्ये ठेवण्यात आल्या. मात्र हे शेड चारही बाजूंनी खुले आहे. त्यामुळे या मूर्ती असुरक्षित आहेत.

आता पुरातन मूर्ती धाराशिव जिल्ह्यातील तेरच्या वस्तुसंग्रहालयात नेण्यात येणार आहेत. त्या ठिकाणी या मूर्तींचे संवर्धन व जतन केले जाणार आहे, असे पर्यटन विभागाचे सहसंचालक अमोल गोटे यांनी सांगतिले.