थंडीनंतर घरात पडून राहिली आहे का पेट्रोलियम जेली? ‘या’ पद्धतीने करा वापर

सगळ्यांच्याच घरांमध्ये पेट्रोलियम जेली सहजपणे मिळते. थंडीच्या दिवसांमध्ये पेट्रोलियम जेलीचा जास्त वापर केला जातो. ओठ फुटणे, पायांना भेगा पडणे, थंडीमध्ये स्कीन ड्राय होणे यावर पेट्रोलियम जेली हा एक चांगला उपाय आहे.

याशिवाय स्किन रॅशेसमध्ये सुद्धा पेट्रोलियम जेली लावता येते. सेमी सॉलिड जेली खनिज तेल आणि मेण एकत्र करून तयार केली जाते. थंडीच्या दिवसात वापरून जालेली बाटली तशीच पडून राहिली असेल तर, या प्रकारे पेट्रोलियम जेली आपल्या अनेक कामांमध्ये वापरा.

नखांजवळची त्वचा जाड झाली असेल, त्याभागात आग व्हायला लागली असेल तर, वेळीच उपाय केला नाही तर, तिथे इन्फेक्शन होऊ शकतं. त्या भागावर पेट्रोलियम जेलीचा वापर करू शकता. ज्यांची नखं कडक होऊन तुटतात अशा लोकांनी नखांवर पेट्रोलियम जेली लावावी. ज्यामुळे नखं आणि त्यांच्या जवळची त्वचा मऊ होते.

डोळ्यांना केलेला मेकअप सहजासहजी निघत नाही. त्यातच वॉटरप्रूफ मेकअप काढणं सर्वात जास्त कठीण गोष्ट असते. यासाठी पेट्रोलियम जेलीचा वापर करता येऊ शकतो.

पेट्रोलियम जेली हलक्या हातांनी डोळ्यांवर लावा कापसाने किंवा टिशू पेपरने डोळे सावकाश पुसा. यामुळे डोळ्यां जवळच्या त्वचेला किंवा डोळ्यांना कोणतंही नुकसान होत नाही.

केसांना हेअर डाय लावताना जर त्वचेवर लागलं तर त्याचे डाग राहून जातात. असे डाग लागू नयेत यासाठी पेट्रोलियम जेली वापरा. केसांना हेअर कलर करण्याआधी किंवा डाय लावण्याआधी चेहरा मान कान या भागांवर पेट्रोलियम जेली लावून घ्या. म्हणजे या ठिकाणी डाग पडला तरीदेखील डाग राहणार नाहीत.

दाढी करताना जखम होत असेल तर पेट्रोलियम जेली वापरू शकता. दाढी करताना पेट्रोलियम जेली लावली तर, अगदीच सहजपणे शेविंग करता येते.