भारतात आणखी 2 लशींचं होणार ट्रायल; फक्त इंजेक्शन नाही तर नाकावाटेही दिली जाणार लस

जागतिक आरोग्य संघटनेच्या माहितीनुसार जगभरात ज्या कोरोना लशीचं तिसऱ्या टप्प्यातील ट्रायल सुरू आहे, त्या लशी इंजेक्शनमार्फत दिल्या जाणाऱ्या आहेत. दरम्यान काही ठिकाणी नाकावाटे दिल्या जाणारी लसही तयार करण्यात आली आहे आणि भारतातही या लशींच ट्रायल सुरू होणार आहे.

भारतातही आतापर्यंत इंजेक्शनमार्फत दिल्या जाणाऱ्या लशीचं ट्रायल सुरू आहे. लवकरच नाकावाटेदेखील कोरोना लस दिली जाणार आहे. लवकरच इन्ट्रानेझल लशीचं ट्रायल सुरू केलं जाणार आहे.

सीरम इन्स्टिट्युट ऑफ इंडिया आणि भारत बायोटेक नेझल कोरोना लशीचं ट्रायल सुरू करणार आहेत, अशी माहिती केंद्रीय आरोग्यमंत्री डॉ. हर्ष वर्धन यांनी दिली.

सीरम इन्स्टिट्युट ऑफ इंडियाने कोडेजेनिक्स कंपनीच्या CDX 005 लशीचं उत्पादन सुरू केलं आहे. या लशीचं प्राण्यांवर प्री-क्लिनिकल ट्रायल झालं आहे. 2020 च्या अखेरपर्यंत यूएसमध्ये पहिल्या टप्प्यातील लशीचं ट्रायल केलं जाणार आहे. तर सीरम इन्स्टिट्युट या लशीचं भारतात ट्रायल करणार आहे.

भारत बायोटेकनेच वॉशिंग्टन युनिव्हर्सिटी ऑफ मेडिसीनशी करार केला आहे. या लशीचं यूएसमधील सेंट लुईस युनिव्हर्सिटीमध्ये या लशीचं पहिल्या टप्प्यातील ट्रायल होणार आहे. परवानगी मिळाल्यानंतर भारतातही या लशीचं क्लिनिकल ट्रायल होईल, असं आरोग्यमंत्र्यांनी सांगितलं.