अमेरिकेच्या राष्ट्रप्रमुखांचं हेच ते जगाच्या केंद्रस्थानी असलेलं निवासस्थान. डेमोक्रॅटिक पक्षाचे जो बायडन आता या आलिशान निवासात राहायला येतील. सुरक्षा व्यवस्था आणि इतर सोयी तर चोख आहेतच, पण इथलं फाइव्ह स्टार किचनदेखील तितकंच जबरदस्त आहे. जे अमेरिकन राष्ट्राध्यक्ष आणि त्यांच्या कुटुंबीयांना रोज जेवू घालते. तसेच इथे येणाऱ्या मोठ्या पाहुण्यांना एक चवदार डिश दरवेळी खायला मिळते.
कधीकधी अगदी कमी वेळात किचनमध्ये मोठ्या तयारीसाठी सर्व कामे करावी लागतात. सामान्यत: या किचनमध्ये अध्यक्षांची बायको अर्थात फर्स्ट लेडी अधिक लक्ष देतात, असं इथे काम करणारे सांगतात. पण याला अपवाद आहेतच. खास पाहुणे असतील तेव्हा माजी अध्यक्ष आयझेनहॉवर यांची पत्नी व्हाइट हाऊसच्या किचनमध्ये जातीने हजर असायची. सर्व मेन्यू ठरवायची. याउलट डोनाल्ड ट्रम्प यांची पत्नी मेलानिया एकदाही किचनमध्ये फिरकल्या नाहीत.
व्हाईट हाऊसच्या किचन मध्ये कोणत्याही वेळी 140 पाहुण्यांचं जेवण बनवू शकतं इतकं सक्षम नेहमी असतं. कधीही अचानकपणे अध्यक्ष आणि त्यांचे कुटुंब कुठलेही कार्यक्रम ठरवतात त्यावेळी हजार लोकांची व्यवस्था होऊ शकेल या बाबतीत त्यांना तयार राहणं गरजेचं असते. अध्यक्ष आणि त्यांच्या कुटुंबीयांच्या वैयक्तिक पार्ट्या केल्या, तर त्या महिन्याच्या शेवटी वापरल्या जाणाऱ्या जास्तीच्या साहित्याचे बिल त्यांना द्यावं लागते.
दर चार वर्षांनी जेव्हा या इमारतीत नवीन राष्ट्राध्यक्ष येतात तेव्हा त्यांच्या आवडीनिवडीनुसार व्हाइट हाऊसच्या किचनमधील मेन्यू आणि ऑर्डरमध्ये बदल केला जातो. यातही 20 जानेवारीच्या दिवशी जेव्हा नवीन राष्ट्राध्यक्ष या इमारतीत येतात त्या दिवशी राष्ट्रपतींच्या आवडीचे पदार्थ तयार केले जातात. यावेळी हे सर्व तयार करण्यासाठी किचनमधील स्टाफना सहा तासांचा वेळ दिला जातो.
