तुमच्या या हेल्दी सवयी तुम्हाला बनवतायेत अनहेल्दी, शरीराला पोहोचवतात हानी

जास्त ब्रश करणं – आपले दात जास्त चमकदार दिसावेत आणि स्वच्छ व्हावेत यासाठी दिवसातून कित्येक तरी वेळा जोरजोराने घास घासणे चांगलं नाही. यामुळे दात आणि हिरड्यांवर दुष्परिणाम होतात. दातांच्या समस्या उद्भवू शकतात. दात चांगले ठेवण्यासाठी नरम टुथब्रशचा वापर करा आणि हलक्या हाताने हळुवारपणे दात घासा.

जास्त झोप - काही जणांना 7 ते 8 तासांची झोप खूप वाटते तर काहींना यापेक्षाही जास्त वेळा झोपून राहायला आवडतं. मात्र जास्त झोपल्याने आरोग्यावर दुष्परिणाम होऊ शकतात. एका अभ्यासानुसार दरदिवशी 9 तासांपेक्षा जास्त झोपणाऱ्यांना 7-8 तास झोपणाऱ्यांच्या तुलनेत अल्झामर होण्याचा धोका दुप्पट असतो.

व्यायाम - व्यायाम करणं आरोग्यासाठी चांगलं आहे मात्र जास्त व्यायाम तुम्हाला नुकसान पोहोचवू शकतं. काही जणांना फिट राहण्याचं इतकं वेड असतं, की त्यासाठी जे भरपूर व्यायाम करतात, यामुळे त्यांच्या आरोग्याला हानी पोहोचू शकते. कठीण असा व्यायाम केल्यानंतर तुमच्या शरीराला थोड्या आरामाची गरज असतं. त्यामुळे व्यायामात शरीराला ब्रेक न दिल्याने तुम्हाला दुखापत तर होईलच शिवाय योग्य परिणामही दिसणार नाही.

 जास्त फायबरचं सेवन - पचनप्रक्रिया सुरळीत राहण्याठी फायबर गरजेचं आहे. मात्र जास्त प्रमाणात फायबर घेतल्यास पोटफुगी, गॅसची समस्या उद्भवू शकते. जर तुम्हाला फायबरची मात्रा वाढवायची असेल तर हळूहळू प्रमाण वाढवा.

व्हिटॅमिनचा हायडोस - व्हिटॅमिन्सचा हायडोस तुमच्या आरोग्यासाठी नुकसानदायक ठरू शकतो. एका संशोधनानुसार मर्यादेपेक्षा जास्त व्हिटॅमिन्स घेतल्यानं तुम्हाला गंभीर आजार बळावू शकतात.

 सूचना - या लेखात दिलेली माहिती सर्वसामान्य माहितीवर आधारीत आहे. न्यूज 18 लोकमत याची पुष्टी देत नाही तज्ज्ञांचा सल्ला जरूर घ्यावा.