सर्वसामान्यांसाठी थोडी खुशी थोडा गम; 1 एप्रिलपासून तुमच्या खिशावर परिणाम करणारे 8 बदल

तुम्हीही नोकरी करत असाल, तर 1 एप्रिलपासून तुमच्यासाठी काही मोठे बदल होऊ शकतात. तुमचा पीएफ, वेतन आणि कामाचे तास यामध्ये बदल होण्याची शक्यता आहे. मागील वर्षी संसदेत पास केलेल्या कोड ऑन वेजेज या तीन बिलांमुळे हे बदल होऊ शकतात.

मूळ वेतन, ग्रॅच्युटी आणि पीएफही वाढेल, पण यामुळे टेक होम सॅलरी कमी होईल. 12 तास काम आणि 5 तासानंतर अर्धा तास ब्रेक. तसंच 15 ते 30 मिनिटं एक्स्ट्रा काम करणं ओव्हरटाईममध्ये सामिल करण्याची तरतूद आहे.

कोरोनाच्या वाढत्या प्रादुर्भावामुळे आर्थिक वर्ष 2019-2020 चा दुरुस्ती केलेला किंवा उशीर झालेला आयटीआर भरण्याची मुदत वाढवली गेली होती. आता पुन्हा एकदा केंद्र सरकारनं वित्त विधेयक - 2021 नुसार, नियमात बदल केला आहे.  यानुसार तुम्ही उशीरा आयकर भरला तर 1 एप्रिल 2021 पासून जास्त विलंब शुल्क द्यावं लागेल.

सध्याच्या नियमानुसार, करदात्याला मुल्यांकन वर्षाचा परतावा मार्च पर्यंत भरण्याची मुभा होती. तेच यानंतर डिसेम्बरपर्यंत भरल्यावर 5000 रुपयांचं शुल्क आणि मार्चच्या शेवटपर्यंत 1000 रुपयांचं शुल्क द्यावं लागत होतं.  मात्र आता एप्रिलपासून सुरू झाल्यानं ही सवलत संपुष्टात येणार आहे. करदात्यांजवळ दहा हजार रुपये देत मागच्या वर्षीचा परतावा भरण्याची सुविधा आता मार्चपर्यंत असणार नाही.

औषधांच्या किमती एप्रिलपासून वाढण्याची शक्यता आहे. सरकारनं औषधांची निर्मिती करणाऱ्या कंपन्यांना वार्षिक होलसेल प्राइस इंडेक्समध्ये  0.5 टक्क्यांची वाढ करण्याची मान्यता दिली आहे. अशी माहिती  नॅशनल फार्मस्यूटीकल प्राइसिंग ऑथिरीटीनं दिली.

यामुळे पेनकिलर म्हणजेच वेदना कमी करण्यासाठी घेतल्या जाणाऱ्या गोळ्या, अँटीइन्फ्लाटीव, कार्डियक आणि अँटीबायोटीक्ससह इतर आवश्यक औषधांसाठीही अधिकचे पैसे मोजावे लागणार असल्याची शक्यता आहे.

फेब्रुवारी आणि मार्च 2021 दरम्यान गॅस सिलेंडरचे दर 125 रुपयांपर्यंत वाढले. अशात आता इंडियन ऑईल कॉर्पोरेशनकडून (IOC) सर्वसामान्यांना काहीसा दिलासा देण्यात आला आहे.

इंडियन ऑईलने दिलेल्या माहितीनुसार, आता 1 एप्रिल 2021 पासून घरगुती गॅस सिलेंडरसाठी 10 रुपये कमी मोजावे लागणार आहेत.  सिलेंडरचे नवे दर 1 एप्रिल 2021 पासून लागू होणार आहेत.

घर खरेदी-विक्री करणाऱ्यांच्या खिश्याला आता कात्री बसणार आहे. घर जमीन खरेदी विक्री करण्यासाठी जास्त पैसे द्यावे लागणार आहेत. राज्यशासनाने दिनांक 31 मार्चपर्यंत मुद्रांक शुल्कात 2 टक्के  सवलत दिली होती.

मुद्रांक शुल्कात ( stamp duty) सवलत होती ती रदद् करण्याचा निर्णय ठाकरे सरकारने घेतला आहे.  त्यामुळे आता घर, जमीन विक्रीसाठी 5 टक्के मुद्रांक शुल्क द्यावे लागणार आहे.

केंद्र सरकारने सर्वसामान्य गुंतवणुकदारांना मोठा धक्का दिला आहे. 1 एप्रिलपासून पीपीएफसह (PPF) सगळ्या ठेवींवरील व्याजदरांमध्ये (Interest rates on Investment) मोठी कपात करण्यात आली आहे. सगळ्या ठेवींवरील व्याजदरात सरासरी एक टक्का घट करण्याचा निर्णय घेण्यात आला आहे.. 1 एप्रिल 2021 ते 30 जून 2021 या तिमाहीसाठीचे हे दर असतील.

1 एप्रिलपासून सेव्हिंग डिपॉझिटवर 3.5%, एक, दोन आणि पाच वर्षांच्या डिपॉझिटवर अनुक्रमे 4.4%, 5%, 5.8% व्याज देण्यात येईल. तसंच पीपीएफवर 6.4 टक्के व्याज मिळेल. सिनियर सिटीझन सेव्हिंग स्कीममध्ये 7.4 ऐवजी 6.5%, नॅशनल सेव्हिंग सर्टिफिकेटवर 6.8 ऐवजी 5.9%, किसान विकास पत्रावर 6.9 ऐवजी 6.2% आणि सुकन्या समृद्धी योजनेवर 7.6 ऐवजी 6.9% व्याज देण्यात येणार आहे.

केंद्र सरकारने देशातील राष्ट्रीयकृत बँकांचं विलीनीकरण करण्याचा निर्णय जाहीर केला होता. तो आता 1 एप्रिल 2021 पासून लागू होणार आहे.

देना बँक, विजया बँक, कॉर्पोरेशन बँक, आंध्रा बँक, ओरिएंटल बँक ऑफ कॉमर्स, युनायटेड बँक, अलाहाबाद बँक या बँकांच्या विलीनीकरणाची प्रक्रिया 1 एप्रिल 2019 पासून सुरू झाली होती आणि 1 एप्रिल 2021 ला ती पूर्ण होईल. त्यामुळे या सर्व बँकांची पासबुक आणि चेकबुक 1 एप्रिल 2021 पासून अवैध ठरणार आहेत.

केंद्र सरकारने पॅन कार्डला आधारशी लिंक करण्याची मुदत आणखी वाढवली आहे. त्यामुळे आता 30 जून 2021 पर्यंत पॅन कार्ड आधारशी लिंक करता येणार आहे.

यापूर्वी पॅन-आधार लिंक करण्याची शेवटची तारीख 31 मार्च 2021 होती. केंद्र सरकारने बुधवारी आधार-पॅन लिंक करण्याची शेवटची तारीख, शेवटच्या काही तासांत वाढवण्याचा निर्णय घेतला आहे.

भारतीय बाजारात सोन्याच्या दरातील घसरण सुरूच आहे. दिल्ली सराफा बाजारात 31 मार्च 2021 रोजी सोन्याचा भाव (Gold Price Today) 188 रुपये प्रति 10 ग्रॅमने कमी झाला आहे. 24 कॅरेट सोन्याचा दर 43,925 रुपये प्रति 10 ग्रॅम इतका आहे.

चांदीच्या किंमतीत 771 रुपये प्रति किलोग्रॅमची घसरण झाली आहे. दिल्ली सराफा बाजारात बुधवारी चांदी भाव 62,441 रुपये प्रति किलोग्रॅम इतका आहे.