WORK FROM HOME करताना तहान लागेना? अशी भरून काढा शरीरातील पाण्याची कमतरता

सध्या कोरोनाच्या परिस्थितीत अनेक जण घरातून ऑफिसचं काम म्हणजे वर्क फ्रॉम होम करत आहेत. अनेकांनी कामात स्वत:ला इतकं झोकून दिलं आहे की त्यांना तहान-भूकही लागत नाही. जेवण तर अवेळी होतंच आहे, मात्र पाणी पिणं तर होतच नाही. कित्येक जण फक्त जेवतानाच पाणी पितात.

आता उन्हाळा मागे सरू लागला आहे आणि पावसाळा उंबरठ्यावर आला आला आहे. अशा वातावरणात तहानही फारशी लागत नाही. त्यामुळे वर्क फ्रॉम होम आणि बदलतं वातावरण यामुळे शरीरात पाण्याची कमतरता अधिकच निर्माण होणार आहे. तहान लागली नाही तरी आपल्या शरीराला पाण्याची गरज आहे, त्यामुळे शरीराला आवश्यक तितकं पाणी कसं जाईल, याची काळजी आपण घ्यायला हवी.

पाणी पिण्याची आठवण राहावी यासाठी अलार्म लावा. अलार्म वाजला की पाणी प्या किंवा तुमच्या दिवसभरातील अत्यावश्यक कामांच्या यादीत पाण्याचा समावेश करा जेणेकरून पाणी पिणं होईल.

पाण्याचा स्वाद वाढवा. एका भांड्यात पिण्याचं पाणी घेऊन त्यात रात्रभर लिंबू आणि आल्याचे तुकडे टाकून फ्रिजमध्ये ठेवा. हे पाणी दुसऱ्या दिवशी तुम्ही दिवसभर पिऊ शकता. पाणी चविष्ट लागत असल्याने तुम्ही ते वारंवार पित राहाल.

रात्री झोपताना एक ग्लासभर पाणी किंवा पाण्याची बाटली जवळ ठेवा. जेणेकरून रात्री जाग आल्यानंतर तुम्ही पाणी पिऊ शकता. याशिवाय ज्याप्रमाणे घराबाहेर जाताना आपण पाण्याची बाटली सोबत ठेवतो, तसं घरातही सोबत ठेवा. काम करताना डेस्कवर पाण्याची बाटली समोर असू द्या. जेणेकरून तुमची त्यावर नजर पडेल आणि तुम्ही पाणी प्याल.

कलिंगड, संत्री, काकडी असं पाण्याचं प्रमाण जास्त असलेल्या फळांचं सेवन करा. याशिवाय फळांचा ज्युस, लस्सी, मिल्कशेक, ताक प्या.