IIT च्या विद्यार्थ्यांनी भन्नाट आयडिया! पॅकेजिंगसाठी प्लास्टिकऐवजी काकडीच्या सालाचा वापर

काकडी खाल्ल्यानंतर तुम्ही काकडीची साल टाकून देता ना? पण लवकरच या काकडीची प्लॅस्टिकला पर्याय म्हणून वापरात येण्याची शक्यता आहे. आयआयटी कानपूरच्या विद्यार्थ्यांनी सांगितलं की, काकडीच्या सालामध्ये सेल्युलोजचं प्रमाण जास्त असतं. या सालापासून काढलेल्या सेल्युलोज नॅनोक्रिस्टल्सचा वापर अन्नाचं पॅकेजिंग करण्यासाठी केला जाऊ शकतो.

प्लास्टिकचा वापर पर्यावरणासाठी अतिशय घातक आहे. त्यामुळे प्लॅस्टिकसाठी इकोफ्रेंडली पर्याय निर्माण करण्याचा प्रयत्न जगभरातील संशोधक करत आहेत.

भारतामध्ये काकडीचा वापर कोशिंबीर, सॅलड म्हणून केला जातो. नुसती काकडी खाणंही अनेकांना आवडतं. डाएट करणारी माणसं काकडीचा वापर आपल्या डाएटमध्येही करतात. या काकडीच्या सालाचा वापर होत नाही. रोज हजारो टन काकडीची सालं टाकून दिली जातात.

आजकाल लोकांमध्ये प्लास्टिक वापराच्या विरोधात जागृती झाली आहे. प्लास्टिक जसं पर्यावरणासाठी घातक आहे. तसंच ते आरोग्यासाठीही धोक्याचं आहे. त्यामुळे प्लास्टिकचे कंटेनर, डब्यांना काही पर्याय मिळाला तर ग्राहकांकडूनही त्याचं स्वागतच होईल.

काकडीच्या सालावर प्रक्रिया करुन त्याचा वापर अन्नाचं पॅकेजिंग करता येईल का यावर सध्या संशोधन सुरू झालं आहे.