कोरोना लॉकडाऊनमुळे झालं ब्रेकअप; पुन्हा पॅचअप करायचंय? मग तुमच्यासाठी टीप्स

लॉकडाऊनमध्ये काही कपल्स एकत्र राहण्यासा आनंद लुटत आहेत, तर काही कपल्सचं ब्रेकअप झालं आहे. लॉकडाऊनमध्ये छोट्या छोट्या कारणांवरूनही कपल्समध्ये भांडण झाली आणि त्यामुळे अनेकांनी आपलं रिलेशनशिप संपवलं. मात्र घाईत घेतलेल्या त्या निर्णयाचा आता पश्चाताप होत असेल तर पुन्हा पॅचअप कसं करायचं हा प्रश्न असेल. हे तुटलेलं नातं पुन्हा कसं जोडाल यासाठी टीप्स.

पुन्हा एकदा नीट विचार करा - तुम्हाला पुन्हा पॅचअप का करायचं आहे, याचा नीट विचार करा. आपला एकटेपणा दूर करण्यासाठी जर तुम्ही पॅचअप करत असाल तर चुकीचं आहे. यामुळे तुमचं नातं पुन्हा तुटू शकतं. तुमचं ब्रेकअप का झालं त्याबाबत विचार करा आणि पूर्ण परिस्थिती लक्षात घेऊन त्यातून मार्ग काढण्याचा प्रयत्न करा.

एकमेकांच्या चुका दाखवू नका - ब्रेकअपनंतर अनेक कपल्स एकमेकांना चुकीचं ठरवतात जे योग्य नाही. जर तुम्हाला खरंच ब्रेकअप केल्याचा पश्चाताप होत असेल तर आपला मोठेपणा दाखवण्यापेक्षा तुमच्या चुकीची माफी मागा. जर तुम्ही त्यांच्याच चुका दाखवत बसलात तर परिस्थिती आणखी बिघडू शकते.

प्रेम व्यक्त करा - ब्रेकअपनंतर प्रेम व्यक्त करण्यात थोडा वेळ लागणारच. मात्र तुम्ही प्रेम व्यक्त करण्याचा जुना मार्ग वापरून पाहा. लव्ह लेटर किंवा मेसेजमार्फत स्वत:च्या मनातलं त्याच्यापर्यंत पोहोचवू शकता. एखादी शायरी किंवा  गाण्याचे बोल त्यांना डेडिकेट करू शकता आणि तुमचं त्यांच्यावर किती प्रेम आहे हे दाखवून द्या.

धीर ठेवा - ब्रेकअपनंतर नातं पुन्हा जुळायला थोडा वेळ लागतोच. त्यामुळे घाई करू नका, धीरानं घ्या. ब्रेकअपमुळे तुमचा पार्टनर रागात असेल किंवा इतर समस्येत अडकला असेल. अशावेळी त्याला जास्त त्रास देऊ नका. नाहीतर तो जास्त चिडेल.

दूर राहा - जर तुम्हाला तुमचा पार्टनर पुन्हा आयुष्यात हवा असेल तर पर्सनल स्पेसचा विचार करा. नात्यात पर्सनल स्पेस असणं खूप गरजेचं आहे. तुमचं नातं का तुटलं ते कारण समजून पुन्हा तसं करणार नाही, ही गाठ मनाशी बांधून ठेवा.