#TRPमीटर : विक्रांत सरंजामेवर भारी पडल्या पाठकबाई

गेल्या वेळच्या टीआरपी रेटिंगमध्ये 'चला हवा येऊ द्या' पहिल्या पाचमध्ये नव्हता. त्याच्या जागी झिंग झिंग झिंगाट हा नवा शो आला होता. पण डिसेंबरच्या पहिल्या आठवड्याच्या रेटिंगनुसार 'हवा'नं पुन्हा एकदा पाचव्या नंबरवर बाजी मारलीय.

'स्वराज्यरक्षक संभाजी'नं आपलं चौथं स्थान कायम ठेवलंय. शिवाजी महाराजांचं देहावसान झाल्याचं संभाजी महाराजांना कळतं, तो बसलेला धक्का त्याचं बेअरिंग डाॅ. अमोल कोल्हेनं चांगलंच पेललं होतं. या ऐतिहासिक मालिकेत प्रत्येक कलाकार ती ती व्यक्तिरेखा जिवंत उभी करतात. प्रेक्षकांसमोर इतिहासच उभा राहतो. म्हणून ही मालिका नेहमीच पाचात असते.

टीआरपी रेटिंगमध्ये पहिल्या पाचात पुन्हा एकदा झी मराठीच्याच मालिका आहेत. इतर वाहिन्यावर काही बदल झालेत, त्याचा परिणाम कसा होतो ते कळेलंच. पण सध्या तरी झीला पर्याय नाही.

यावेळी धक्का बसलाय तो 'तुला पाहते रे' मालिकेला. गेली अनेक आठवडे ही मालिका नंबर दोनवर होती. मध्येच ती नंबर वनही झालेली. पण या आठवड्यात ती तिसऱ्या स्थानावर आलीय. डिसेंबरचा पहिला आठवडा हा विक्रांत आणि ईशामधल्या गैरसमजावरच होता. कदाचित त्याचा परिणाम फारसा चांगला झाला नाही. प्रेक्षकांना विक्रांत आणि ईशाला एकत्रच पाहायला आवडत असावं.

दुसऱ्या स्थानावर आलेत राणादा आणि पाठकबाई. राणाचं मॅटवरची कुस्ती जिंकणं, कुस्तीमागचं राजकारण अशा बऱ्याच घडामोडी मालिकेत घडल्या. त्याचा परिणाम पहिल्यांदा तुझ्यात जीव रंगला नंबर दोनवर आलीय.

पुन्हा एकदा 'माझ्या नवऱ्याची बायको' मालिका पहिल्या स्थानावर अबाधित राहिलीय. या आठवड्यात तर मालिकेत कहरच झालेत. शनायानं गच्चीवरून उडी काय मारली, त्याचा दोष राधिकाकडे काय गेला. खूप फिल्मी घटना घडल्यानं मालिका जास्त पाहिली गेली.