'दबंग 3 नंतर आयुष्यच बदललं', असा होता महेश मांजरेकरांच्या लेकीचा सलमानसोबतच्या कामाचा अनुभव

जबरदस्त डायलॉग्स, धमाल कॉमेडी पण तेवढीच मारामारी आणि टशन असं कॉम्बिनेशन असलेली मसाला मुव्ही म्हटलं की दबंग सिनेमाचं नाव डोळ्यासमोर येतं. दबंग सिनेमाचे तिन्ही भाग अशा सगळ्या मसाल्याने भरलेले आहेत. दबंग 3 नेही सलमानच्या चाहत्याचं मन जिंकलं. या सिनेमाच्या निमित्ताने सई मांजरेकर (Sai Manjrekar ) ही मराठी अभिनेत्री पहिल्यांदा बॉलीवूडमध्ये झळकली. या सिनेमानंतर माझं आयुष्यच बदलून गेलं असं तिचं म्हणणं आहे.

दबंग 3 मधील अनुभवाबाबत सई म्हणते, “प्रामाणिकपणे सांगायचं झालं तर सलमानसोबत पहिला सिनेमा करणं म्हणजे माझ्यासाठी स्वप्नच सत्यात उतरल्यासारखं होतं. सलमान खान, सोनाक्षी सिन्हा अशा बड्या कलाकारांसोबत काम करताना अनेक गोष्टी शिकायला मिळाल्या. एकूणच हा माझ्या आयुष्यातला अतिशय सुंदर अनुभव होता.”

दबंग 3 मधील रोलची कशी तयार केली याबद्दल सई म्हणते, “या सिनेमातली माझी भूमिका मला अत्यंत आवडली होती. भूमिका समजून घेण्यासाठी प्रभूदेवा सरांनी फार मदत केली. या सिनेमासाठी उत्तर प्रदेशात बोलली जाणारी भाषा आत्मसात करुन घ्यावी लागली त्यासाठी वेगवेगळे सिनेमे पाहिले तसंच मी माझ्या वडिलांसोबत गावागावात शूटिंगलाही जात असे त्याची बोलण्याची पद्धत, लहेजा समजून घेतला.”

सई मांजरेकरने दबंग 3च्या कामाचा अनुभव फारच चांगला असल्याचं सांगितलं आहे. सलमान खानने मला सेटवर अत्यंत सहजपणे वागवलं. प्रत्येक सीन करताना मी माझा सर्वात चांगला सीन कसा देईन याकडे सलमानचं लक्ष असायचं. असं ती म्हणते.

दबंग 3 सिनेमामुळे सई मांजरेकरला स्वत:ची ओळख मिळाली आहे. सध्या सई तिच्या आगामी प्रोजेक्ट्सवर काम करत आहे.