'दुनियादारी'तल्या शिरीनच्या भूमिकेसाठी सई नाही तर 'या' अभिनेत्रीला होती पहिली पसंती

‘दुनियादारी’ सिनेमातील सई ताम्हणकरने साकारलेली शिरीन विशेष गाजली. पण सई या भूमिकेसाठी पहिली पसंती नव्हतीच.

सई ताम्हणकरच्या करियरला या चित्रपटानंतर वेगळी कलाटणी मिळाली.

पण सई या भूमिकेसाठी पहिली पसंती नव्हतीच. मराठीतील एका प्रसिद्ध अभिनेत्रीने हा खुलासा केला आहे.

मराठी चित्रपटसृष्टीमधील अतिशय लोकप्रिय अभिनेत्री म्हणून तेजस्विनी पंडितला ओळखले जाते. अनेक चित्रपट, मालिका, वेबसीरिज मधून तिने विविध भूमिका साकारल्या आहेत.

नुकत्याच एका मुलाखतीत तेजस्विनीने “दुनियादारी’ चित्रपटाबाबत मोठा खुलासा केला आहे.

या चित्रपटात अभिनेत्री सई ताम्हणकरने शिरीन ही भूमिका साकारली होती. मात्र ही भूमिका मला ऑफर करण्यात आली होती, असा मोठा गौप्यस्फोट तेजस्विनी पंडितने केला आहे.

याविषयी बोलताना तेजस्विनीने सांगितलं कि,''दुनियादारी हा चित्रपट माझा होता. त्यात शिरीनचा रोल हा मला ऑफर करण्यात आला होता. पण 16 डिसेंबरला माझं लग्न होतं आणि त्यानंतर चार दिवसांनी म्हणजे 20 डिसेंबर पासून शूटींग सुरु होणार होतं.''

''त्यावेळी संजय दादानं मला हातावर मेहंदी काढायची नाही, असं सांगितलं होतं. त्यामुळे मी स्वत: लग्न असताना मेहंदी काढली नव्हती. पण दुसऱ्या दिवशी बाबांनी सकाळी पेपरमध्ये दुनियादारीची बातमी वाचली, त्यात कुठेही माझं नावं नव्हतं. त्यानंतर मी सगळ्यांना फोन करून विचारलं पण कुणीच नीट उत्तर दिली नाहीत.''

तसंच ''या चित्रपटात का नाकारले याचे उत्तर मला आजही मिळालेले नाही'' असे तेजस्विनीने म्हटले.