सुशांत सिंह राजपूत प्रकरणात रिया चक्रवर्तीला अटक करणं CBI साठी नाही सोपं; कारणं पाहा

सुशांत सिंह राजपूत (Sushsnt Singh Rajput) मृत्यू प्रकरणात सीबीआय, ईडी आणि एनसीबी अशा तीन केंद्रीय यंत्रणा तपास करत आहेत.याबाबत नवनवे खुलासे होत आहेत.

सीबीआयने तपास सुरू केल्यापासून आठव्या दिवशी रिया चक्रवर्तीला (Rhea Chakraborty) पहिल्यांदाच चौकशीसाठी बोलावलं. रियाची आज सलग चौथ्या दिवशी चौकशी होते आहे. 26 तासांपेक्षा अधिक तपास झाल्यानंतर रियाला अटक कधी होणार असा प्रश्न प्रत्येकाला आहे.

रियाला घाईघाईत अटक करून त्यानंतर पुरेसे पुरावे नसल्याने तिला लगेच जामीन मिळू नये, यासाठी सीबीआय या प्रकरणात प्रत्येक पाऊल खबरदारीने टाकते आहे.

या प्रकरणावर प्रत्येकाचं लक्ष आहे. त्यामुळे सीबीआयला या संपूर्ण प्रकरणावरील पडदा उठवायचा आहे. शिवाय इतर तांत्रिक बाबींचा विचार करता रियाला अटक करणं सीबीआयसाठी सोपं नाही.

सुशांतच्या वडिलांनी एफआयआरमध्ये रियावर सुशांतला आत्महत्येसाठी प्रवृत्त केल्याचा आरोप लावला आहे. मात्र याबाबत सीबीआय ठोस पुरावे सापडलेले नाहीत.

या प्रकरणातील साक्षीदारांचीही साक्षही सीबीआयसाठी मोठं आव्हान आहे. सुशांतच मित्र सिद्धार्थ पिठानी आणि कुक नीरज यांची सुरुवातीपासूनच चौकशी सुरू आहे. मात्र कोणताच साक्षीदार आपल्या जबाबावर स्थिर नाही. 13 आणि 14 जूनला सुशांतच्या फ्लॅटमध्ये काय झालं याबाबत या जबाबात फरक आहे.

साक्षीदारांच्या जबाबानुसार कोण खरं आणि कोण खोटं बोलतं हे सीबीआयला समजत नाही आहे. त्यामुळे पॉलिग्राफ टेस्ट होऊ शकते.रियाची पॉलिग्राफ टेस्ट केली जाऊ शकते, असं सांगितलं जातं आहे.

रियाने सुशांतला आत्महत्येसाठी प्रवृत्त केलं असेल तर सुशांतची ऑटोप्सी, विसरा आणि फॉरेन्सिक रिपोर्ट महत्त्वपूर्ण आहेत. मात्र सीबीआयला हे प्रकरण दोन महिन्यांनतंर सोपवण्यात आलं आहे. आधीच्या तपास अहवालावर अनेक प्रश्न उपस्थित करण्यात आले आहे. त्यामुळे सीबीआयला या रिपोर्टमधून काही हाती लागणार नाही.

आता फॉरेन्सिक रिपोर्ट सीबीआयसाठी मोठं अस्त्र आहे. एम्सच्या फॉरेन्सिक टीमने कूपर रुग्णालयातील डॉक्टरांना याची विचारणा केली आहे. लवकरच या प्रकरणात नवे खुलासे होऊ शकतात.