यशाच्या शिखरावर असूनही सनी लिओनीला वाटते 'या' गोष्टीची खंत

अभिनेत्री सनी लिओनीने आपल्या मेहनतीने बॉलिवूडमध्ये स्वतःचं स्थान पक्क केलं. तिचं स्वतःचं असं जबरदस्त फॅन फॉलोविंग आहे. सध्या यशाच्या शिखरावर असलेल्या सनीला आयुष्यात एका गोष्टीची नेहमीच खंत राहिली आहे.

आयएएनएसला नुकत्याच दिलेल्या एका मुलाखतीत सनीने तिची खंत बोलून दाखवली. सनी म्हणाली की, ‘इन्स्टाग्रामवर २ कोटी फॅन फॉलोवर्स आहेत. पण खासगी आयुष्यात तिचे फार कमी मित्र- मैत्रीणी आहेत. माझ्या भूतकाळावरून आजही लोक मला गृहीत धरतात.’

सनी पुढे म्हणाली की, ‘माझ्या मोजक्याच मित्रांसोबत मिळून मी स्वतःसाठी एक जागा तयार केली आहे. मला बाहेर पार्टीला जाणं फारसं आवडत नाही. तसंच मी इतर कार्यक्रमांनाही जाणं टाळते. त्यामुळे माझा मित्र- परिवार फार कमी आहे.’

‘माझ्या भूतकाळावरूनच अजूनही लोक मला गृहित धरतात की नाही याबद्दल मला माहीत नाही. पण जे काही असेल मी आधीही आनंदी होते आणि मी आताही आनंदी आहे. माझ्या आयुष्याचा हा पट्टा फार समाधान देणारा आहे.’

एवढं बोलून सनी थांबली नाही ती पुढे म्हणाली की, ‘मी अशा अनेक पालकांना वेळेचं नियोजन करताना पाहिलं आहे. माझ्यासाठी हे थोडं कठीण आहे. कारण माझ्यासाठी प्रत्येक दिवस नवीन असतो. पण जेव्हा तुम्ही एकदा आई- बाबा होता तेव्हा आपसुक तुमच्या दिनक्रमात बदल होतो. तुम्ही वेळेचं नियोजन करायला लागता. आपल्या मुलांना पाहणं हे जगातलं सर्वात मोठं सुख आहे. हा माझ्या आयुष्यातला सर्वात उत्कृष्ट काळ आहे.’

सनी लिओनीने ‘जिस्म २’ सिनेमातून बॉलिवूडमध्ये पदार्पण केलं. २०१२ मध्ये हा सिनेमा प्रदर्शित झाला होता. यानंतर ती ‘रागिनी एमएमएस २’, ‘एक पहेली लीला’, ‘कुछ- कुछ लोचा है’, ‘मस्तीजादे’ आणि ‘वन नाइट स्टँड’ सिनेमांत दिसली.