Ajay Purkar : बाजीप्रभूंनंतर आता सुभेदार तान्हाजी मालुसरेंच्या भूमिकेत झळकणार अजय पुरकर

दिग्दर्शक दिग्पाल लांजेकर निर्मिती करत असलेल्या 'शिवराज अष्टक' या मालिकेतील 'पावनखिंड' हा तिसरा सिनेमा होता. त्या नंतर आलेला 'शेर शिवराज' या चित्रपटाने देखील बॉक्स ऑफिसवर भरपूर कमाई केली होती. त्यानंतर आता या अष्टकातील पाचवा सिनेमा प्रेक्षकांच्या भेटीला येणार आहे.

'सुभेदार' असं या चित्रपटाचं नाव असून सुभेदार तान्हाजी मालुसरेंच्या सिहंगडावरील पराक्रमावर आधारित हा चित्रपट असणार आहे.

प्रेक्षकांसाठी आनंदाची बातमी म्हणजे या चित्रपटात सुभेदार तान्हाजी मालुसरेंच्या भूमिकेत अभिनेते अजय पुरकर दिसणार आहेत.

'पावनखिंड' या चित्रपटामध्ये बाजीप्रभू देशपांडे यांची भूमिका अभिनेते अजय पुरकर यांनी साकारली होती. त्यांची ही भूमिका प्रचंड गाजली होती. प्रेक्षकांनी या भूमिकेला भरभरून प्रतिसाद दिला होता.

त्यानंतर आता अजय पुरकर सुभेदार तान्हाजी मालुसरेंची भूमिका जिवंत करण्यासाठी सज्ज झाले आहेत.

त्यांच्यासोबत या चित्रपटात चिन्मय मांडलेकर, मृणाल कुलकर्णींसह स्मिता शेवाळे आणि समीर धर्माधिकारी देखील झळकणार आहेत.

नुकताच गोडवली ग्रामस्थ आणि नरवीर तानाजी मालुसरे कुटुंबियांच्या उपस्थितीत सुभेदार चित्रपटाची संहिता पूजन सोहळा नुकताच संपन्न झाला. यावेळी सुभेदार तानाजी मालुसरे यांची भूमिका साकारणारे अजय पुरकर, समीर धर्माधिकारी, स्मिता शेवाळे आणि दिग्दर्शक दिग्पाल लांजेकर उपस्थित होते.

नरवीर तानाजी मालुसरे यांच्या जन्मस्थानी म्हणजेच सातारा जिल्ह्यातील गोडवली गावात त्यांच्या कुटुंबियांच्या उपस्थितीत सुभेदार चित्रपटाच्या संहितेचे पूजन करून या चित्रपटाचा श्रीगणेशा करण्यात आला.