#FitnessFunda आपल्या एव्हरग्रीन दिसण्यामागचा फंडा सांगतोय सुनील बर्वे

काही जण कितीही वर्षाचे झाले तरी त्यांच्या लूकमध्ये फारसा बदल होत नाही. अभिनेता सुनील बर्वे त्यापैकी एक. अगदी आत्ताआत्तापर्यंत मालिकांमध्ये तो नायकच असायचा. चाळीशीनंतरही सुनील बर्वे इतका एव्हरग्रीन कसा दिसतो, हे वाचा त्याच्याच शब्दात

हे दिसणं मला अनुवंशिकतेनं मिळालंय. तरीही फिटनेससाठी मी मेहनत घेतोच.

नियमित व्यायाम आणि आहार या दोन गोष्टी खूप महत्त्वाच्या आहेत. पण एक्झरसाईज आणि एक्झर्शन यातला फरकही लक्षात घ्यायला हवा.

व्यायामाच्या वेळी व्यायामच करावा लागतो. म्हणजे नेहमीच्या जीवनात मी ट्रेन पकडतो, एवढं चालतो, जिने उतरतो असं अनेक जण सांगतात. त्यांना तो व्यायाम वाटतो. पण असं करून व्यायाम होत नाही.

सकाळी व्यायामासाठी किमान 40 ते 45 मिनिटं देणं आवश्यक आहे.

मला आता काही डोलेशोलेच्या भूमिका मिळणार नाहीत. त्यामुळे जिममध्ये जात नाही. पूर्वी जात होतो.

मी आरे काॅलनीत नियमित वाॅकला जातो. आठवड्याला 12 ते 13 मीटर धावतो. रोज 5 ते 6 किलेमीटर धावणं होतं.

मी शाकाहारी आहे. मी चिकन, मटन खात नाही.

मला चवीपुरतं खायला आवडतं. मी खाण्याचा फार शौकिन नाही. मी आहार सांभाळतो, त्याच्या आहारी जात नाही.

माझी रोज पूजा असते. तेव्हा दहा मिनिटं मेडिटेशन करतो. एरवी काम करताना त्यात झोकून देतो, तेच माझं मेडिटेशन.

सुनील बर्वे साधंसोपं फिटनेस करतो. पण तो नियमित करतो. त्याच्या चिरतरुण दिसण्यामागे या फिटनेस फंड्याचंही योगदान आहे.

महाराष्ट्र जागते रहो – अजूनही वेळ गेली नाही या कलर्सवरच्या कार्यक्रमाचं सुनील बर्वे सूत्रसंचालन करतोय.