Kangana Ranaut Birthday: कंगना रणौतला अशी मिळाली होती 'गँगस्टर'ची ऑफर, जाणून वाटेल आश्चर्य

कंगना रणौत बॉलिवूडमधील यशस्वी अभिनेत्रींपैकी एक आहे. तसेच ती चित्रपट निर्मातीदेखील बनली आहे. कंगना ही बॉलिवूडमधील सर्वाधिक मानधन घेणाऱ्या अभिनेत्रींमध्ये गणली जाते. तिने पडद्यावर अनेक दमदार भूमिका साकारल्या आहेत. एकेकाळी उपाशी झोपलेल्या या अभिनेत्रीचे यश थक्क करणारे आहे. हिमाचल प्रदेशातील भांबला येथे 23 मार्च 1987 रोजी जन्मलेल्या या अभिनेत्रीला लहानपणापासूनच अभिनयाची आवड होती.

'क्वीन', 'पंगा गर्ल' म्हणून ओळखली जाणारी कंगना रणौत सतत विविध विषयांवर आपलं मत मांडत असते. अनेकवेळा ती वादग्रस्त वक्तव्य करून चर्चेत येते.

कंगना रणौतचे वडील अमरदीप रणौत यांना आपल्या मुलीला डॉक्टर बनवायचं होतं. पण कंगनाला अभिनय आणि मॉडेलिंगच्या जगात नाव कमवायचं होतं. मीडियाला दिलेल्या मुलाखतीत कंगनाने सांगितलं होतं की, ती 12 वीत नापास झाली होती. आणि आई-वडिलांशी भांडण करून दिल्लीला आली होती.

जेव्हा कंगनाने घर सोडलं तेव्हा ती अवघ्या 16 वर्षांची होती. कंगना रणौतने आपल्या मॉडेलिंग करिअरची सुरुवात दिल्लीत केली. हे दिवस खूप कठीण होते. कंगनाने स्वतः सांगितलं होतं की, 'अनेकदा तिला फक्त ब्रेड किंवा भाकरी आणि लोणचं खाऊन दिवस काढावे लागले होते'.

कंगनाचे वडील आपल्या मुलीच्या मॉडेलिंग आणि चित्रपटात काम करण्याच्या विरोधात होते. त्यामुळे तिला घरून आर्थिक मदत मिळाली नाही. बाप-लेकीतील दुरावा खूप वाढला होता. दिल्लीनंतर, कंगना आपली स्वप्नं पूर्ण करण्यासाठी मुंबईत आली होती.

कंगना रणौतने 2006 साली प्रदर्शित झालेल्या 'गँगस्टर' या चित्रपटातून बॉलिवूडमध्ये पदार्पण केलं होतं. हा चित्रपट मिळण्याचा किस्सासुद्धा तितकाच रंजक आहे.

मीडिया रिपोर्ट्सनुसार, अनुराग बसूने कंगनाला एका कॅफेमध्ये कॉफी पिताना पाहिलं. आणि वेटरमार्फत कंगनाला एक पेपर पाठवला, ज्यावर तिला अभिनयात रस आहे की नाही हे लिहिलं होतं. तिथे तिला ऑडिशनची ऑफर देण्यात आली.

या चित्रपटांनंतर कंगनाला सर्वोत्कृष्ट पदार्पण अभिनेत्रीचा पुरस्कार मिळाला होता.