नक्षलवाद ते बॉलिवूड : भाजपमध्ये प्रवेश करण्यापूर्वी कसा होता मिथुन चक्रवर्तींचा प्रवास?

बॉलिवूडमध्ये आपली कारकिर्द गाजवणाऱ्या मिथुन चक्रवर्ती यांनी त्यांच्या आयुष्यातील एका नवीन इनिंगची सुरुवात केली आहे. नुकताच त्यांनी भाजप पक्षात प्रवेश केला आहे.

काही दिवसांपूर्वीच मोहन भागवत यांनी मिथुन चक्रवर्तीची भेट घेतली होती. त्यामुळे त्यांचा भाजप प्रवेश होऊ शकतो अशा चर्चांना सोशल मीडियावर जोर आला होता.

मुळचे बंगाली असलेल्या मिथुन चक्रवर्तींनी हिंदी चित्रपटांतून आपली एक खास ओळख निर्माण केली आहे.

मिथुन चक्रवर्ती यांनी 1976 मध्ये 'मृगया' या चित्रपटातून आपल्या करियरची सुरुवात केली. त्यांना पहिल्याच चित्रपटासाठी 'राष्ट्रीय चित्रपट पुरस्कार' मिळाला होता.

1980 मध्ये त्यांच्या चित्रपटसृष्टीतील यशाचा आलेख उंचावला. ते एक उत्तम डान्सर म्हणून नावारूपाला आले.

1982 मध्ये प्रदर्शित झालेला 'डिस्को डान्सर' हा चित्रपट अतिशय लोकप्रिय ठरला होता. त्यात त्यांनी डिस्को डान्सर 'जिमी'ची भूमिका साकारली होती.

मिथुन चक्रवर्ती यांनी जवळपास 350 हिंदी चित्रपटांतून अभिनय केला आहे. हिंदीसोबातच त्यांनी बंगाली, ओडिशा आणि भोजपुरी चित्रपटांतदेखील काम केलं आहे.

मिथुन चक्रवर्ती अभिनेता होण्याआधी नक्षलवादी विचारांनी प्रभावित होते. मात्र एका दुर्घटनेमुळे त्यांनी आपला मार्ग बदलून अभिनय क्षेत्रात प्रवेश केला.

मिथुन चक्रवर्ती यांनी बॉलिवूड अभिनेत्री 'योगिता बाली' यांच्याशी विवाह केला आहे. त्यांना चार मुलंसुद्धा आहेत.

मिथुन चक्रवर्ती यांचा मुलगा महाक्षय चक्रवर्ती याने 2008 मध्ये 'जिमी' या चित्रपटातून बॉलिवूडमध्ये पदार्पण केलं. त्यांनतर 2011 मध्ये भारतातील पहिला स्टोरीओ स्कोपिक हॉरर चित्रपट 'हॉटेंड'मध्ये काम केलं आहे.

काही वर्ष ते चित्रपटसृष्टीपासून दूर होते. त्यानंतर त्यांनी छोट्या पडद्यावर पुनरागमन करत, 'डान्स इंडिया डान्स'मध्ये परीक्षकाची भूमिका पार पाडली आहे.

त्यांनी आपल्या अभिनयाच्या कारकिर्दीत राष्ट्रीय पुरस्कार, फिल्मफेअर, स्टार स्क्रीन, स्टारडस्ट असे अनेक पुरस्कार आपल्या नावे केले आहेत.

या जबरदस्त कलाकाराची राजकीय जडणघडण आता कशी असेल, याकडे सगळ्यांचं लक्ष असून त्यांची ही नवी इनिंग कशी असेल हे पाहणं महत्त्वाचं ठरणार आहे.