किती शक्तीशाली आहेत ओडिशाचे मंत्री नबा दास? ASI ने का झाडल्या गोळ्या? Key पॉईंट

ओडिशाचे आरोग्य आणि कुटुंब कल्याण मंत्री नबा किशोर दास यांच्यावर रविवारी झारसुगुडा जिल्ह्यात ASI (सहाय्यक पोलीस उपनिरीक्षक) यांनी गोळ्या झाडल्या. घटनेनंतर नबा दास यांना तातडीने रुग्णालयात दाखल करण्यात आले, सध्या त्यांची प्रकृती चिंताजनक आहे. आरोग्यमंत्र्यांच्या छातीत गोळी लागल्याचे सांगण्यात येत आहे. ही संपूर्ण घटना ओडिशातील ब्रजराजनगर शहरात दुपारी एकच्या सुमारास घडली.

या हल्ल्यानंतर ओडिशाचे मुख्यमंत्री नवीन पटनायक यांनी रुग्णालयात जाऊन आपल्या मंत्र्यांच्या प्रकृतीची विचारपूस करत कुटुंबाचे सांत्वन केले. या हल्ल्याबाबत ते म्हणाले, 'या हल्ल्याच्या दुर्दैवी घटनेने मला धक्का बसला आहे. मी याचा तीव्र निषेध करतो आणि त्यांना लवकरात लवकर बरे होवो ही शुभेच्छा. या घटनेची चौकशी करण्याचे निर्देश गुन्हे शाखेला देण्यात आल्याचे त्यांनी सांगितले. चला जाणून घेऊया या घटनेशी संबंधित मुख्य गोष्टी.

ब्रजराजनगरचे एसडीपीओ गुप्तेश्वर भोई यांनी सांगितले की, सहायक पोलीस उपनिरीक्षक गोपाल दास यांनी आरोग्यमंत्र्यांवर गोळीबार केला. स्थानिक लोकांनी एएसआयला पकडून पोलिसांच्या ताब्यात दिले. एएसआयने मंत्र्यावर गोळीबार का केला याचा तपास सुरू आहे.

आरोग्य मंत्री नबा दास यांना प्रथम झारसुगुड जिल्हा मुख्यालय रुग्णालयात नेण्यात आले. मात्र, पुढील उपचारांसाठी त्यांना भुवनेश्वरला विमानाने हलवण्यात आले. आरोग्यमंत्र्यांवर झालेल्या हल्ल्याची माहिती मुख्यमंत्री नवीन पटनायक यांना देण्यात आली. यानंतर ते नबा दास यांना भेटण्यासाठी भुवनेश्वर रुग्णालयात पोहोचले.

आरोग्य मंत्री नबा दास हे बीजेडीचे ज्येष्ठ नेते आहेत. अलीकडेच शनि मंदिरात 1.7 किलो सोन्याचा कलश अर्पण केल्याने ते प्रकाशझोतात आले होते. याशिवाय 5 किलो चांदीचा कलशही मंदिरात दान करण्यात आला होता.

नबा किशोर दास यांची गणना झारसुगुडा जिल्ह्यातील प्रभावशाली नेत्यांमध्ये केली जाते. नबा दास पूर्वी काँग्रेस पक्षात होते. काँग्रेसच्या बड्या नेत्यांमध्ये त्यांची गणना होत होती. त्यानंतर त्यांनी काँग्रेस सोडून बीजेडीमध्ये प्रवेश केला.

इथेही नबा दास यांची मोहिनी कमी झाली नाही. सीएम नवीन पटनायक यांनी नबा दास यांच्याकडे अनेक महत्त्वाच्या खात्याची जबाबदारी दिली. मीडिया रिपोर्ट्सनुसार, नबा दास यांना लक्झरी वाहनांचाही शौक आहे. त्यांच्याकडे सुमारे 16 कोटी रुपयांची 80 वाहने आहेत.

नबा किशोर दास यांनी 2004 मध्ये ओडिशातील झारसुगुडा मतदारसंघातून काँग्रेसच्या तिकिटावर पहिल्यांदा निवडणूक लढवली होती. पण ते पराभूत झाले. त्यानंतर 2009 मध्ये त्यांनी काँग्रेसच्या तिकिटावर निवडणूक लढवली आणि जिंकली. 2014 मध्येही काँग्रेसकडून विजयी झाले. 2019 च्या निवडणुकीत ते बिजू जनता दलाच्या तिकीटावर लढून सलग तिसऱ्यांदा या जागेवरून आमदार म्हणून निवडून आले.

दास यांना लक्ष्य करण्याचा कट रचण्यात आल्याचा आरोप नबा दास यांच्या समर्थकांनी केला आहे. एसडीपीओने सांगितले की, आरोपी एएसआयला अटक करण्यात आली असून त्याची चौकशी सुरू आहे.

नबा दास यांच्याकडे कोट्यवधी रुपयांची रोकड आणि गुंतवणूक आहे, तर त्यांची पत्नीही कोट्यवधी रुपयांच्या मालमत्तेची मालक आहे. अहवालानुसार, नबा दास यांच्या पत्नीकडे 30 कोटी रुपयांपेक्षा जास्त चल-अचल संपत्ती असल्याचे सांगण्यात आले आहे.