कोरोनाच्या दुसऱ्या लाटेतील हैराण करणारा प्रकार; आईचा रिपोर्ट निगेटिव्ह, मात्र जन्मजात मुलीचा पॉझिटिव्ह

कोरोनाची दुसरी लाट जितकी धोकादायक आहे तितकीच हैराण करणारीही आहे. वाराणसी येथील एका रुग्णालयातून धक्कादायक प्रकरण समोर आलं आहे.

या रुग्णालयातील एक नवजात मुलगी कोविड पॉझिटिव्ह आली आहे. विशेष म्हणजे या मुलीच्या आईची कोविड टेस्ट निगेटिव्ह आली आहे.

रुग्णालयातील डॉक्टरांनी ही रेअर केस मानली असून आईची पुन्हा आरीपीसीआर टेस्ट करणार असल्याचं सांगितलं आहे.

अनिल कुमार यांच्या 26 वर्षीय गर्भवती पत्नीवर बीएचयूमध्ये उपचार सुरू होते. दरम्यान 25 मे रोजी डिलिव्हरीची तारीख नक्की करण्यात आली होती. यापूर्वी डॉक्टरांनी कोविड टेस्ट केली.

मुलीच्या जन्मानंतर तिचीही कोविड टेस्ट करण्यात आली आणि ती पॉझिटिव्ह होती. यानंतर सर्वजण हैराण झाले. आई व बाळाची प्रकृती ठीक असून पुन्हा एकदा दोघांची टेस्ट करण्यात येणार असल्याचं सांगितलं जात आहे.

याबद्दल डॉक्टरांनी सांगितलं की, आरटी-पीसीआरची सेंसिटीव्हीटी 70 टक्क्यांपर्यंत असते. पुन्हा एकदा टेस्ट करण्यात येईल. गरज पडल्यास आईची अँटीबॉडी टेस्टही केली जाईल. त्यानंतर नेमका प्रकार स्पष्ट होईल.