IPS Pooja Yadav Success Story: कॅनडा, जर्मनीची गलेलठ्ठ पगाराची नोकरी सोडून झाली IPS; IAS सोबत विवाह

यूपीएसी परीक्षा उत्तीर्ण करणाऱ्या प्रत्येक उमेदवाराची कहाणी खास असते. काही जण खडतर संघर्ष करून इथपर्यंत पोहोचतात, तर काहींनी आपल्या आराम आणि चैनीच्या नोकऱ्या सोडून इथे येण्याचा पर्याय निवडला. पूजाची गोष्टही अशीच आहे. तिने इथे येण्यापूर्वी तिची परदेशी नोकरी सोडली.

पूजा यादव ही मूळची हरियाणाची आहे. 20 सप्टेंबर 1988 रोजी जन्मलेल्या पूजा यादवने हरियाणामधून सुरुवातीचे शिक्षण घेतले. तिने बायोटेक्नॉलॉजी आणि फूड टेक्नॉलॉजीमध्ये एमटेक केले. एमटेक केल्यानंतर ती कॅनडाला गेली. काही वर्षे कॅनडामध्ये काम केल्यानंतर ती जर्मनीला गेली. परदेशी नोकरीत पैसा होता, सोयी होत्या. पण पूजाचे समाधान झाले नाही. नोकरी सोडून ती भारतात परतली.

भारतात आल्यानंतर पूजा यादवने यूपीएससी परीक्षेची तयारी सुरू केली. पहिल्याच प्रयत्नात फेल झाली. त्यानंतर दुप्पट मेहनत घेऊन दुसऱ्या प्रयत्नात 174 वा रँक मिळवली. पूजा यादव या 2018 च्या बॅचच्या IPS अधिकारी आहेत.

पूजा सोशल मीडियावर खूप सक्रिय असते. हरियाणामध्ये बालपण गेलेल्या पूजा यादवची गणना देशातील सर्वात सुंदर प्रशासकीय अधिकाऱ्यांमध्ये केली जाते. 2018 बॅचची आयपीएस अधिकारी गुजरात केडरमधील अधिकारी आहे.

पूजाला आयपीएस अधिकारी होण्याचा निर्णय घेणे खूप कठीण होते. कारण ती तिचं यशस्वी करिअर तिला सोडावं लागलं. पूजाच्या कुटुंबाने पाठिंबा दिला पण आर्थिक पाठबळ देऊ शकले नाही. अशात पूजा यांनी एमटेकचा अभ्यास करत असताना आणि यूपीएससी परीक्षेची तयारी करत मुलांना शिकवणी शिकवली आणि खर्च भागवण्यासाठी रिसेप्शनिस्ट म्हणूनही काम केले.

पूजा आणि 2016 च्या बॅचचे IAS अधिकारी विकल्प भारद्वाज यांचे 2021 साली लग्न झाले. ते केरळ केडरचे अधिकारी आहेत. पूजाशी लग्न केल्यानंतर त्यांनी गुजरात केडरमध्ये बदलीची विनंती केली. दोघेही मसुरी येथील लाल बहादूर शास्त्री नॅशनल अॅकॅडमी ऑफ अॅडमिनिस्ट्रेशन येथे भेटले होते.