आजचा निकाल ऐतिहासिक! बोर्डाच्या न झालेल्या दहावी परीक्षेचा निकाल आज दुपारी होणार जाहीर; अशी असणार मूल्यांकन पद्धत

16 जुलै म्हणजेच आजचा दिवस ऐतिहासिक आहे. कारण आज एका अशा परीक्षेचा निकाल जाहीर होणार आहे जी परीक्षा कधी झालीच नाही. कोरोनामुळे दहावीची परीक्षा होऊ शकली नाही मात्र राज्याचा शिक्षण मंडळाकडून (SSC Result Website) विशेष मूल्यांकन पद्धतीनं निकाल जाहीर करण्यात येणार आहे. पण ही मूल्यांकन पद्धत (Special Assessment system) नक्की असेल तरी कशी? याबद्दल जाणून घेऊया.

दहावीची परीक्षा कोरोनाच्या संकटामुळे घेण्यात आली नाही. मात्र विद्यार्थ्यांसमोर प्रश्न होता तो म्हणजे निकालाचा. मात्र अखेर यावर तोडगा काढत विशेष मूल्यांकन पद्धतीनुसार निकाल लावण्यात येईल असं ठरलं.

या मूल्यांकन पद्धतीनुसार विद्यार्थ्यांच्या आधीच्या वर्षाचे म्हणजे नववीचे गुण तसंच दहावीतील विद्यार्थ्यांकडून वर्षभरात देण्यात आलेले स्वाध्याय आणि विविध परीक्षा यावर आधारित असलेले गुण यांचं मूल्यांकन केलं जाणार आहे.

म्हणजेच दहावीत अंतर्गत स्वाध्यायांसाठी 30 गुण, प्रात्यक्षिकसाठी 20 गुण आणि नववीत मिळवलेल्या गुणांसाठी 50 गुण असं वेटेज असणार आहे. अशा पद्धतीनं दहावीच्या निकालाचं मूल्यांकन केलं जाणार आहे. हे सर्व गुण संबंधित शाळांकडून पाठवण्यात आले आहेत.

आज म्हणजेच 16 जुलैला दुपारी 1 वाजता ऑनलाईन पद्धतीनं महाराष्ट्र स्टेट बोर्ड दहावीचा निकाल जाहीर करण्यात येणार आहे. maharashtraeducation.com या वेबसाईटवर विद्यार्थ्यांना हा निकाल बघता येणार आहे.

मुख्यपृष्ठावरील महाराष्ट्र इयत्ता 10 च्या निकालाच्या 2021 च्या लिंकवर क्लिक करा. आपणास एका नवीन पृष्ठावर पुनर्निर्देशित केले जाईल. आपली क्रेडेन्शियल्स टाइप करा आणि लॉग इन करा. आपला एसएससी निकाल आपल्या स्क्रीनवर दिसून येईल. अशा पद्धतीनं निकाल बघता येणार आहे.