महत्त्वाची कामं या आठवड्यात तरी मार्गी लागतील का? असं आहे साप्ताहिक राशीभविष्य

या सप्ताहात गुरू मीन राशीत असेल तर शनी कुंभ राशीत मार्गी अवस्थेत असून मंगळ वृषभ राशीत भ्रमण करेल. बुध दिनांक 7 फेब्रुवारी रोजी सकाळी 07.39 वाजता मकर राशीत प्रवेश करेल. सूर्य देखील मकर राशीत भ्रमण करेल. सूर्य बुध राजयोग निर्माण होईल. राहु-केतू मेष व तुळ राशीत आहेत. शुक्र कुंभ राशीत भ्रमण करेल. या आठवड्यात गुरू प्रतिपदा, संकष्टी चतुर्थी असे अनेक शुभ दिवस असून सप्ताह सर्व वाचकांना मंगलमय जावो. ग्रहपरिवर्तन  व लग्नानुसार साप्ताहिक भविष्य .

मेष राशी स्वामी मंगळ मार्गी स्थितीत असल्याने काहीसे उत्साही वातावरण आहे.राशीतील राहू वर्तमान काळात प्रत्येक बाबतीत द्विधा मनस्थिती करेल .चतुर्थ स्थानात चंद्र उच्च आहे. त्यामुळे घरामध्ये आनंद राहील. मातृ पितृ भेट होईल. दशम स्थानातील रवि बुध कार्य क्षेत्रात नवीन संधी देतील. गुरू धर्म विषयक आस्था तसेच त्या क्षेत्रात अधिकारी व्यक्तीची भेट घडवून देईल. उत्तरार्ध संतती साठी शुभ समाचार आणेल. एकूण सप्ताह मिश्र फळ देणारा ठरेल. गुरू उपासना करावी.

वृषभ- राशी स्वामी शुक्र हा राजयोग कारक असून भाग्य स्थानात शनि सोबत शुभ योग निर्माण करीत आहे. राशीतील मंगळ उष्णतेपासून भय तसेच स्वभावात उग्र स्वरुप आणेल. लाभ स्थानातील गुरू मित्र आणि संतती पासून फायदा करून देईल. प्रवासाचे योग येतील.बहीण भावांशी संबंध सुधारतील.तसेच संपर्क, नवीन ओळखी यापासून फायदा होईल. तृतीय चंद्र शुभ फळ देणारा ठरेल. मना वर ताबा ठेवून हा आठवडा काळजीपूर्वक घालवावा. व्यय स्थानातील राहू आणि षष्ठ केतू खर्चाचे नियोजन योग्य प्रकारे करा तसेच परदेश संबंधी व्यवहार सावध राहून करा असे आवाहन करीत आहे. सप्ताह चांगला जाईल.

मिथुन राशी स्वामी बुधाचे अष्टम स्थानातील भ्रमण बुद्धी भेद तसेच डोक्यासंबंधी त्रास दाखवीत आहे. अष्टम स्थानात रवि बुध योग जपून राहण्याचे संकेत देत आहे. घरामध्ये अतिशय खर्च होईल. नवीन वस्तूंच्या खरेदी आणि दुरुस्तीसाठी पैसा टाकावा लागेल. तसेच दवाखाना आणि औषधे यावर देखील खर्च होईल . कार्य क्षेत्र गुरूच्या शुभ प्रभावाखाली आहे. तिथे मात्र नवीन संधी प्राप्त होतील. वरिष्ठांची मर्जी राहील.नको तिथे धाडस करू नका. संततीची काळजी घ्या. उत्तरार्धात आर्थिक लाभ मात्र भरपूर होतील. शुभ सप्ताह.

कर्क - राशी स्वामी चंद्र स्वगृही असला तरी पौर्णिमा असल्यामुळे मानसिक अस्वस्थता सहन करावी लागेल. भाग्यातील गुरू धार्मिक आस्था निर्माण करेल. तीर्थ क्षेत्राचे तसेच परदेश प्रवास घडतील. मित्र मैत्रिणीशी संबंध ताणले जाण्याची शक्यता आहे. जपून रहा. दशम राहू हा कार्यक्षेत्रात होणाऱ्या बदलांचा कारक आहे. योग्य निर्णय घेऊन मार्ग काढावा लागेल. आर्थिक लाभ होतील. तसेच कुटुंबात काही शुभ घटना घडतील. आयुष्यात नवीन व्यक्तीचे आगमन होण्याची शक्यता आहे. अष्टम शुक्र आर्थिकदृष्ट्या चांगले फळ देईल. सप्ताह चांगला.

सिंह - राशी स्वामी रवी बुध शष्ठ स्थानात मातुल घराण्याशी संबंध दाखवीत आहे. शुक्र शनि पत्नीच्या आरोग्यविषयक तक्रारी, तसेच व्यवसाय संबंधात कर्ज, बँकेचे व्यवहार इत्यादी घडवून आणेल. कार्य क्षेत्रात नवीन संधी मिळतील. त्याचा योग्य फायदा घ्या. अष्टम स्थानात गुरू आहे. आयुष्यात स्थैर्य राहणार नाही. रोजचे व्यवहार नेहमीप्रमाणे करा. फारशी अपेक्षा ठेवू नका. चंद्र शत्रू, व नुकसानीपासून सावध राहा असे सांगत आहे. सप्ताह मध्यम.

कन्या राशी स्वामी बुध पंचमात काही शैक्षणिक संधी निर्माण करणार आहे. प्रकृतीची काळजी घ्या. संतती ला देखील फायदे होऊ शकतात. सामाजिक जबाबदारी वाढेल. तसेच समाजात नाव होईल. अष्टम राहू आर्थिक दृष्ट्या सक्षम करेल. शेअर्स लॉटरी पद्धतीने लाभ होईल. मात्र स्त्री रोग तसेच कमरेचे त्रास होऊ शकतात. काहीही कारण नसताना हुरहूर लागून मन अस्वस्थ राहील. गुरू सर्व आपत्ती मधून मार्ग काढेल. अविवाहित व्यक्तींना योग्य जोडीदार मिळतील. सप्ताह उत्तम.

तूळ - शुक्राचे पंचम स्थानातील भ्रमण घरासाठी उंची वस्तूंची खरेदी तसेच संततीसाठी शुभयोग दाखवीत आहे. चतुर्थात सोबत असलेले रवि बुध वास्तू योग शक्यता निर्माण करतील. हालचाली कराव्या लागतील. मातृ-पितृ भेट होईल. गुरू नोकरी आणि व्यवसायासाठी शुभदायक असून मातुल घराण्या कडून शुभ वर्तमान देईल. जोडीदार निवडताना काळजी घ्या. नीट चौकशी करा. तसेच वैवाहिक जीवनात गैर समज होऊ देऊ नका. दशमातील चंद्र भ्रमण सुखद अनुभव देईल. सप्ताह उत्तम.

वृश्चिक राशी स्वामी मंगळ सप्तम स्थानात असून जोडीदार संबंधी नाराजी निर्माण करेल, भांडण टाळा. शत्रू निर्माण होतील. रक्त विकार असणाऱ्यांनी काळजी घ्या. प्रवास, बंधू-भगिनी भेट आणि कला प्रकारात रुची असा हा आठवडा आहे. अनेक नवीन व्यक्तींशी ओळख तसेच संपर्क होईल. संतती प्राप्तीसाठी हा काळ शुभ आहे. भाग्य आणि दशम स्थानातील चंद्र पूर्वार्धात शुभ फळ देईल. धार्मिक कार्यक्रम होतील. प्रवास योग येतील. लाभदायक सप्ताह आहे.

धनु - राशी स्वामी गुरू चतुर्थ स्थानात गृह सौख्य, नवीन वाहन लाभ दाखवीत आहे. घरामध्ये काही सजावट, नवीन सुख सोयी करून घ्याल. पंचमातील राहू कुटुंबात वाढ सूचवित आहे. अनेक नवीन विषयात रुची निर्माण होईल. धन स्थानातील ग्रहाधिक्य आर्थिक लाभ,तसेच कुटुंबात काही शुभ घटना दाखवीत आहे.मंगळ पराक्रमात वाढ करेल.तसेच शत्रू निर्माण करेल.पण अखेर विजय तुमचाच होईल. अष्टम चंद्र भ्रमण आर्थिक लाभ पण खर्चिक सप्ताह आणि मानसिक ताण दाखवीत आहे. उत्तरार्ध अनुकूल जाईल.

मकर राशीतील ग्रहांचे योग हे परस्पर पूरक असून शुभ फळ देतील. उष्णतेचे विकार सतावू शकतात. शुक्र आकर्षक व्यक्तिमत्व देईल. गंभीर स्वभावाच्या मकर राशीच्या जातकांचा सप्ताह मौजमजेचा जाईल.तसेच काही शुभ घटना घडतील. खतृतीय गुरू प्रवास आणि बंधुभेट घडवेल. तुमच्या संभाषण कौशल्यात विशेष वाढ होईल. वैवाहिक जीवन सुखाचे राहील.चतुर्थ मंगळ घरा संबंधी व्यवहार घडवेल. सप्ताह एकूण चांगला जाईल.शनीची उपासना करावी.

कुंभ राशी स्वामी शनि स्वस्थानात शुक्र या ग्रहासोबत आणि षष्ठ चंद्र काही अनपेक्षित पेच प्रसंग निर्माण करू शकतो. आरोग्य जपा. दवाखान्याच्या फेऱ्या तसेच औषध पाण्यावर खर्च होऊ शकतो. काहीही अनाठायी धाडस करू नका. चतुर्थ मंगळ मातृ चिंता निर्माण करेल. वाद करू नका. घरात शांतता ठेवा. आर्थिक लाभ तसेच पैतृक संपत्ती यासंबंधी हा आठवडा शुभ आहे. पूर्वार्ध जपून रहा. व्यय रवि बुध कायद्याचे भान ठेवा असे सांगत आहे उत्तरार्ध मध्यम राहील.

मीन राशीतील गुरू तसेच व्यय स्थानातील शुक्र आठवड्यात शुभ समाचार देतील. शनी कुंभ राशीत मित्र मैत्रिणी आणि वयस्क व्यक्तींकडून ताण दाखवीत आहे.संततीची काळजी घ्या. त्यांना आवश्यक तेवढा वेळ द्या. वैवाहिक जीवन सुखाचे राहील. गुरू चंद्र योग पूर्वार्ध सुखद करेल. प्रवास तसेच बंधू भेट संभवते.पण भावाला प्रकृतीचे त्रास संभवतात. पूर्वार्ध अनुकूल असून गुरू उपासना करावी शुभ सप्ताह. शुभम भवतू !!