शहीद योगेश भदाणे यांच्या पार्थिवावर मूळगावी अंत्यसंस्कार

15 जानेवारी, धुळे : जम्मू काश्मीरमध्ये शहिद झालेले लान्सनायक योगेश भदाणे यांच्या पार्थिवावर त्यांच्या मूळगावी म्हणजेच खलाणेत लष्करी इतमामात अंत्यसंस्कार झालेत. धुळे जिल्ह्यातील शहिद जवान योगेश भदाणे यांचं पार्थिव दुपारच्या सुमारास नाशिकच्या ओझर विमानतळावर दाखल झालं होतं. त्यानंतर ते हेलिकॉप्टरनं धुळ्याच्या खलाणे गावी नेण्यात आलंय. जम्मू काश्मीरच्या सुंदरबन सेक्टरमध्ये पाकिस्तानने केलेल्या गोळीबारात जवान योगेश भदाणे शहिद झालेत.

शनिवारी सुंदरबनी सेक्टरमध्ये पाकिस्तानने भारतीय चौकीवर गोळीबार केला. भारतीय सैन्यानेही जशाच तसे उत्तर दिले. मात्र या गोळीबारात लान्सनायक योगेश मुरलीधर भदाणे जखमी झाले होते. त्यांना उपचारासाठी रुग्णालयात दाखल केले. पण उपचारादरम्यान त्यांचं निधन झालं. 28 वर्षीय लान्सनायक योगेश भदाणे हे धुळ्यातील खळाणे गावातील रहिवासी आहे. त्यांच्या पश्चात पत्नी आणि परिवार आहे. योगेश मुरलीधर भदाणे हे बहादुर सैनिक होते.