नागपूर, 19 जुलै: मैत्री करण्यासाठी मुलीवर वारंवार दबाव टाकणाऱ्या आणि छेड काढणाऱ्या तरुणाला लोकांनी चांगलाच चोप दिला. यावेळी महाविद्यालयीन विद्यार्थिनीनेही आपला दुर्गावतार दाखवत छेडणाऱ्याच्या कानशिलात लगावली. नागपूर जिल्ह्यातील कळमेश्वर बस स्थानकात आज ही घटना घडली. यावेळी छेड काढणाऱ्या युवकाची नागरिकांच्या मदतीने बेदम धुलाई करुन, त्याला कळमेश्वर पोलिसांच्या स्वाधीन करण्यात आलं. नागपूरातील गोधनी परिसरात राहणारा संदीप निंबूरकर असं या प्रकरणातील आरोपीचं नाव आहे. नागपूर जिल्ह्यातील कळमेश्वर बसस्थानकावर घडलेल्या या प्रकाराचा व्हिडिओ सोशल मीडियावर व्हायरल झाला आहे.
