'राजगृह' तोडफोड प्रकरणी देवेंद्र फडणवीसांनी अतिरिक्त पोलीस आयुक्तांकडे केली मागणी

मुंबई, 08 जुलै : भारतरत्न महामानव डॉ. बाबासाहेब आंबेडकर यांचे मुंबईतील निवासस्थान असलेल्या राजगृहावर दोन अज्ञात व्यक्तींनी तोडफोड केली. या प्रकरणी भाजपचे विरोधी पक्षनेते देवेंद्र फडणवीस यांनी निषेध व्यक्त केला आहे.

देवेंद्र फडणवीस यांनी ट्वीट करून या प्रकरणी तातडीने कारवाई करण्याची राज्य सरकारकडे मागणी केली आहे.

'डॉ. बाबासाहेब आंबेडकर यांचे निवासस्थान असलेल्या 'राजगृह' यावर करण्यात आलेला हल्ला हा अत्यंत निषेधार्ह असून आरोपींना तात्काळ अटक व्हावी' अशी मागणी देवेंद्र फडणवीस यांनी केली.

तसंच, 'मी स्वतः मा. भीमराव (दादासाहेब) आंबेडकर  यांच्याशी फोनवर चर्चा केली आणि अतिरिक्त पोलीस आयुक्तांशी चर्चा करून आरोपींना तात्काळ अटक करण्याची मागणी केली आहे' असंही फडणवीस यांनी सांगितले.

... अतिरिक्त पोलीस आयुक्तांशी चर्चा करून आरोपींना तात्काळ अटक करण्याची मागणी केली आहे.

(2/2)

— Devendra Fadnavis (@Dev_Fadnavis) July 7, 2020

मंगळवारी रात्री दोन अज्ञात व्यक्तींनी मुंबईतील डॉ. बाबासाहेब आंबेडकर यांचे निवासस्थान राजगृहावर जाऊन तोडफोड केली.  घराच्या काचांवर दगडफेक करण्यात आली तर कुंड्यांचं मोठं नुकसान करण्यात आलं. एवढंच नाहीतर सीसीटीव्ही कॅमेऱ्याही तोडण्याचा प्रयत्न केला.  या घटनेमुळे राज्यात खळबळ उडाली आहे.

प्रकाश आंबेडकर यांचे अनुयायांना शांत राहण्याचे आवाहन

प्रकाश आंबेडकर यांनी या प्रकरणावर प्रतिक्रिया दिली आहे. राजगृहावर दोन व्यक्ती आले होते ही गोष्ट खरी आहे. या दोन व्यक्तींनी नासधूस केली आणि सीसीटीव्ही कॅमेरे तोडण्याचा प्रयत्नही केला. राजगृहावर सर्व पोलीस आणि अधिकारी पोहोचले असून चौकशी सुरू आहे, पोलिसांनी अत्यंत चोख काम केले आहे, अशी माहिती आंबेडकर यांनी दिली.

तसंच, या प्रकरणी सर्व जनतेनं शांतता राखली पाहिजे. राजगृहाच्या आजूबाजूला गर्दी करू नका, अशी विनंतीही आंबेडकर यांनी केली.

दोषींविरुद्ध कठोर कार्यवाही केली जाईल - गृहमंत्री

दादर येथील 'राजगृह' या डॉ.आंबेडकरांच्या निवासस्थानावर काही अज्ञात व्यक्तींनी आज जो हल्ला केला तो निषेधार्थ आहे. याबाबत पोलिसांचा तत्परतेने तपास सुरू असून दोषींविरुद्ध कठोर कार्यवाही केली जाईल, अशी माहिती राज्याचे गृहमंत्री अनिल देशमुख यांनी दिली.

‘राजगृह’ तोडफोडीची घटना निषेधार्ह, विकृत मानसिकतेतून -अजित पवार

भारतरत्न डॉ. बाबासाहेब आंबेडकर यांच्या मुंबईतील ऐतिहासिक महत्वाच्या ‘राजगृह’ निवासस्थानी झालेली तोडफोडीची घटना अत्यंत निषेधार्ह असून हे समाजविघातक विकृत मानसिकतेचं दुष्कृत्य आहे. राज्य शासनाने घटनेची गंभीर दखल घेतली असून पोलिसांनी तात्काळ घटनास्थळी पोहचून तपासकार्य सुरू केलं आहे. आरोपींना लवकरात लवकर शोधून त्यांच्यावर कठोर कारवाई करण्यात येईल. नागरिकांनी असे दुष्कृत्य करणाऱ्या समाजविघातक शक्तींच्या कुहेतूला बळी पडू नये, शांतता, संयम पाळावा, एकजूट कायम ठेवावी, असं आवाहन उपमुख्यमंत्री अजित पवार यांनी केलं आहे.

महामानव डॉ. बाबासाहेबांचे कार्य आणि विचार समाजमनात खोलवर रुजले आहेत, आपल्या सर्वांची त्यांच्यावर भक्कम श्रद्धा आहे, त्या श्रद्धेला कुणीही धक्का लावू शकत नाही, असा विश्वासही उपमुख्यमंत्री अजित पवार यांनी व्यक्त केला आहे.