IPS परमवीर सिंह यांच्याकडून वसुलीचा आरोप, गृहमंत्र्यांची पहिली प्रतिक्रिया

मुंबई, 20 मार्च : मुंबईचे माजी पोलीस आयुक्त परमवीर सिंह यांनी राज्याचे गृहमंत्री अनिल देशमुख यांच्यावर थेट वसुलीचा आरोप केला आहे. मुख्यमंत्र्यांना लिहिलेल्या पत्रात सचिन वाझे प्रकरणावरून परमवीर सिंह यांनी अनेक गौप्यस्फोट केले असून त्यामुळे राज्यासह देशात खळबळ उडाली आहे. आपल्यावर झालेल्या गंभीर आरोपाबाबत गृहमंत्री अनिल देशमुख यांनीही लगेच स्पष्टीकरण दिलं आहे.

'मुकेश अंबानी यांच्या घरासमोर सापडलेली स्फोटकं तसंच मनसुख हिरेन हत्याप्रकरणी सचिन वाजे यांचा सहभाग स्पष्ट होत असताना व त्याचे धागेदोरे तत्कालीन पोलीस आयुक्त परमवीर सिंह यांच्यापर्यंत पोहोचणार असल्याची शक्यता तपासातून होत आहे. त्यामुळे परमवीर सिंह यांनी स्वतःला वाचवण्यासाठी तसेच पुढच्या कायदेशीर कारवाई पासून स्वतःचा बचाव करण्यासाठी हा खोटा आरोप केला आहे,' असा दावा अनिल देशमुख यांनी ट्वीट करत केला आहे.

मुकेश अंबानी प्रकरणी तसेच मनसुख हिरेन हत्याप्रकरणी सचिन वाजे यांचा सहभाग स्पष्ट होत असताना व त्याचे धागेदोरे तत्कालीन पोलिस आयुक्त श्री परमबिर सिंग यांच्यापर्यंत पोहोचणार असल्याची शक्यता तपासातून होत असताना

— ANIL DESHMUKH (@AnilDeshmukhNCP) March 20, 2021

परमबिर सिंग यांनी स्वतःला वाचवण्यासाठी तसेच पुढच्या कायदेशीर कारवाई पासून स्वतःचा बचाव करण्यासाठी हा खोटा आरोप केला आहे.

— ANIL DESHMUKH (@AnilDeshmukhNCP) March 20, 2021

दरम्यान, या सर्व घटनाक्रमामुळे राज्याच्या कायदा आणि सुव्यवस्थेवर तसंच गृहखात्याच्या कारभारावर मोठं प्रश्नचिन्ह निर्माण झालं आहे.