Bihar Election: ‘अमेरिकेत EVM मशीन्स असती तर ट्रम्प हरले असते का?’ काँग्रेसच्या नेत्याने उपस्थित केली शंका

नवी दिल्ली 10 नोव्हेंबर: बिहार विधानसभा निवडणुकीच्या मतमोजणीतल्या कलांनी (Bihar Assembly Election Result) सगळ्याच पक्षांची धाकधुक वाढवली आहे. सुरुवातीला पुढे असतणारी महाआघाडी नंतर पिछाडीवर गेली तर मागे असणाऱ्या NDAने आघाडी घेतलीय. काँग्रेसचे नेते खासदार उदीतराज यांनी पुन्हा एकदा EVM मशिन्सवर शंका उपस्थित केली आहे. अमेरिकेत EVM मशिन्स असत्या तर डोनाल्ड ट्रम्प हे निवडणुक हरले असते का असा सवालही त्यांनी केला आहे.

मंगळावर जाणारं यान जर हॅक करता येऊ शकतं तर EVM मशिन्स का हॅक करता येऊ शकत नाहीत असा सवालही उदीतराज यांनी केला आहे. बिहारमधल्या निकालांनी जशी वळणं घेतली तशा प्रतिक्रियाही बदलत आहेत. मतमोजणी सुरू झाल्यानतर महाआघाडीच्या गोटात आनंदाचं वातावरण होतं नंतर हवा पालटली आणि एनडीच्या बाजूने पारडं झुकलं. त्यामुळे उत्साहाचं वातावरण दुसऱ्या गोटात निर्माण झालं.

आत एनडीच्या बाजूने पारडं झुकल्याने उदीतराज यांनी EVMचा मुद्दा उपस्थित केला आहे. उदीतराज हे 2014 पासून भाजपसोबत होते. नंतर ते काँग्रेसमध्ये दाखल झाले.

2014 पासूनच भाजपला निवडणुकीत विजय मिळायला सुरुवात झाल्यानंतर EVM बद्दल विरोधकांनी शंका उपस्थित करायला सुरूवात केली होती. नंतर ते प्रकरण कोर्टातही गेलं होतं. मात्र त्या मशिन्स हॅक करता येतात हे कुणीही सिद्ध करू शकलं नाही.

अमेरिका में अगर ईवीएम से चुनाव होता तो क्या ट्रम्प हार सकते थे ?

— Dr. Udit Raj (@Dr_Uditraj) November 10, 2020

बिहार विधानसभा निवडणुकीचे निकाल हळूहळू समोर येत आहेत. आतापर्यंत स्पष्ट कल नितीश कुमार यांच्या नेतृत्वाखाली NDA ला मिळालेला दिसतो. आतापर्यंत झालेल्या मतमोजणीच्या आधारावर भाजप आणि जदयू यांच्या NDA ला बहुमत मिळण्याची शक्यता आहे. नितीश कुमारच मुख्यमंत्री होणार असं भाजप नेतेही सांगू लागले आहेत. पण निवडणूक आयोगाने आत्ताच दिलेल्या माहितीनुसार, बिहारमध्ये दुपारी 1 वाजेपर्यंत फक्त 25 टक्के मतमोजणी पूर्ण झाली आहे. अजूनही 4 कोटी मतांची मोजणी बाकी आहे. त्यामुळे निकाल फिरण्याचीही शक्यता आहे.

निकाल फिरू शकतो 2 कारणांमुळे

दुपारी 1 वाजेपर्यंत NDA ला 128 जागांवर आघाडी मिळालेली होती, तर तेजस्वी यादव यांच्या नेतृत्वाखाली महागठबंधनला 100 च्या आसपास जागांवर आघाडी मिळवता आली. पण जवळपास 100 जागांवर दोन उमेदवारांच्या मतांमध्ये 2000 पेक्षाही कमी तफावत आहे. त्यामुळे निवडणूक निकालाचा कल कधीही फिरण्याची शक्यता आहे. दुसरं कारण अद्याप मतमोजणी अंतिम टप्प्यात आलेली नाही. निकाल पूर्ण व्हायला विलंब होऊ शकतो आणि पुढच्या टप्प्यांमध्ये कदाचित कल बदलूही शकतात.